असार १३, काठमाडौँ । आइसीसी टी–२० विश्वकप क्रिकेटको दोस्रो सेमिफाइनल खेल आज राति हुँदै छ । नेपाली समय अनुसार राति सवा ८ बजे (स्थानीय समयअनुसार बिहान १०:३० बजे) सुरु हुने खेलमा भारत र इंग्ल्याण्ड आमने सामने हुने छन्। तर, आजको खेल वर्षाले बिथोल्न सक्ने खतरा रहेको अन्तर्राष्ट्रिय सञ्चारमाध्यमले औंल्याएका छन् ।
वेस्ट इन्डिजको गुयनास्थित प्रोभिडेन्स रंगशालामा खेल हुन लागेको हो । यस क्षेत्रमा दुई दिनदेखि लगातार वर्षात् भइरहेको छ । २७ तारिख बिहान गुयनामा अलिकति आकाश खुल्ने तर वर्षात् पनि हुने भविष्यवाणी गरिएको छ । दिउँसो हावाहुरीसहित अझै सघन वर्षात हुनेछ । भविष्यवाणी अनुसार वर्षातको सम्भावना ९० प्रतिशत छ । ६१ प्रतिशत आकाश बादलले ढाकिनेछ भने भिजिविलिटी ६ किलोमिटर मात्र हुनेछ ।
यसअघि सुपर ८ मा दुवै टीमबीच कम्तीमा ५-५ ओभरको खेल सम्भव भएमा नतिजा आउन सक्थ्यो । तर, सेमिफाइनलमा नतिजा आउन दुवै टीमले कम्तीमा १०-१० ओभर खेल्नुपर्छ । स्थानीय समयअनुसार बिहान १०:३० मा खेल सुरू हुन्छ । यदि वर्षातले निर्धारित समयमा खेल सुरू हुन सकेन भने २५० मिनेटसम्म तन्काउन सकिने गरी व्यवस्था मिलाइएको छ । अर्थात् यदि २.४० बजेसम्ममा खेल सुरू हुन सक्यो भने ओभर घटाउनु पर्दैन । त्योभन्दा पनि ढिलाइ भएको खण्डमा चाहीँ ओभर घटाउनुपर्छ ।
यदि वर्षाका कारणले १०-१० ओभरको खेल पनि हुन सकेन भने भारत सीधै फाइनलमा पुग्नेछ । खेल रद्द भएको खण्डमा सुपर ८ मा आफ्नो समूहमा पहिलो हुने टीम फाइनलमा पुग्ने प्रावधान पहिल्यै तय गरिएको थियो । त्यसैले यदि वर्षातले खेल विथोलिएको खण्डमा भारतलाई फाइदा छ । यदि खेल बराबरीमा टुंगियो र सुपर ओभरबाट पनि नतिजा आएन भने पनि भारत नै फाइनलमा जान्छ ।
रोचक के छ भने भारत र ईंग्ल्यान्डको सेमिफाइनलमा रिजर्भ डे नै राखिएको छैन । जबकि साउथ अफ्रिका र अफगानिस्तानबीचको पहिलो सेमिफाइनलका लागि रिजर्भ डे थियो, जबकि उक्त सेमिफाइनलमा बर्षातको भविष्यवाणी नै थिएन । वर्षातको सम्भावना नभएको खेलमा रिजर्भ डे राखिने तर उच्च सम्भावना भएको खेलमा नराखिनुलाई लिएर धेरैले आश्चर्य व्यक्त गरेका छन् । आईसीसीले भने फाइनल खेलका लागि एक दिन मात्रै ग्याप भएकाले रिजर्भ डे नराखिएको दाबी गरेको छ ।
यसैबीच गुयनामा निरन्तर पानी परिरहँदा मैदान र पिचलाई जोगाउन पर्याप्त ध्यान नपुर्याइएको आरोप पनि लागेको छ । ईंग्ल्यान्डका पूर्वक्रिकेटर माइकल भोनले मैदान पुरै कभर नगरिएकोमा असन्तुष्टि व्यक्त गरेका छन् । निरन्तर पानी परिरहेको अवस्थामा मैदानलाई आंशिक मात्र छोपिएको भन्दै उनले ट्विट गरेका हुन् । केही क्रिकेट विश्लेषकले सकेसम्म खेल रद्द होस भन्ने भारतको चाहनाका कारण मैदान राम्ररी कभर नगरिएको आरोपसमेत लगाएका छन् ।
टी–२० विश्वकपको इतिहासमा इङ्ल्यान्डले भारतसँग चार पटक सामना गरेको छ । दुवै टोलीले दुई–दुई खेल जितेका छन् । पहिलो सेमिफाइनलमा एकतर्फी जित निकाल्दै दक्षिण अफ्रिका फाइनलमा प्रवेश गरिसकेको छ । आज राति हुने दोस्रो खेलको विजेताले उपाधिका लागि दक्षिण अफ्रिकासँग खेल्ने छ ।
सम्भावित प्लेइङ इलेभेन
भारतः रोहित शर्मा (कप्तान), विराट कोहली, ऋषभ पन्त (विकेटकिपर), सूर्यकुमार यादव, शिवम दुबे, हार्दिक पाण्ड्या, रविन्द्र जडेजा, अक्षर पटेल, कुलदीप यादव, जसप्रित बुमराह र अर्शदीप सिंह ।
इंग्ल्याण्ड : फिल साल्ट, जोस बटलर (कप्तान र विकेटकिपर), जोनी बेयरस्टो, ह्यारी ब्रुक, मोइन अली, लियाम लिभिङस्टोन, साम कुरान, क्रिस जोर्डन, जोफ्रा आर्चर, आदिल राशिद, रीस टोपले ।
यस बिषयमा तपाइको प्रतिक्रिया...!