सन्दीपको भिसा लाग्ने विश्वासमा आइसीसीलाई क्यानले बुझायो १४ जनाको नाम भएको सूची

जेठ १४, काठमाडौँ । अमेरिका र वेस्टइन्डिजद्वारा संयुक्त रुपमा आयोजित टी-२० क्रिकेट विश्वकप चार दिनपछि  सुरु हुँदै छ।

१० वर्षपछि दोस्रोपटक नेपाल  टी-२० विश्वकपमा सहभागी हुँदै छ। त्यसका लागि नेपाली क्रिकेट खेलाडीहरु अमेरिका पुगिसकेका छन् र अभ्यास खेलमा सहभागी हुँदै छन्। 

क्यानले क्रिकेटर सन्दीप लामिछानेलाई उच्च अदालत पाटनले बलात्कार आरोपमा सफाइ दिएपछि उनलाई अमेरिका पठाउने तयारी गरेको थियो। त्यसका लागि अमेरिकी भीसाका लागि आवेदन दिए पनि सन्दीपले भीसा पाउन सकेनन्।

तर सन्दीपको भिसा लाग्ने विश्वासमा क्यानले हाल १४ जनाको नाम भएको सूची मात्र बुझाएको बताइएको छ। अमेरिकाले यसअघि सन्दीपलाई भिसा दिन अस्वीकार गरेपछि क्यान पदाधिकारीहरू उनलाई भिसा दिलाउन पुनः प्रयासरत छन्। त्यसका लागि पदाधिकारीहरूले नेपाल सरकारमार्फत् प्रयत्न गरिरहेका छन्।

त्यसैले जेठ १२ (मे २५ तारिख) मा क्यानले आईसीसीमा १५ सदस्यीय खेलाडीको अन्तिम सूची दर्ता गर्नु पर्नेमा १४ सदस्यीय टोलीको नाम मात्र बुझाएको छ ।

आइसीसीलाई अनुरोध गरेर हाल १४ जना खेलाडीको नाम बुझाएको र आईसीसीले केही दिनका लागि पर्खन सहमति दिएको क्यानका खेलाडी छनोट समितिका संयोजक दीपेन्द्र चौधरीको भनाइ रहेको बीबीसी नेपालीले जनाएको छ।

सन्दीपले भीसा पाएमा उनी खेलमा सहभागी हुन पाउने र टोलीसँगै अमेरिकामा रहने एक जना वैकल्पिक खेलाडीमा पर्ने भएका छन् । वैकल्पिक खेलाडीमा परेका उनी विश्वकपभर टीममै रहने छन् । यदी सन्दीपको भीसा नलागे हाल टोलीमा रहेका १५ सदस्यले विश्वकप खेल्ने छ ।

अमेरिकामा रहेका १५ मध्ये १४ जनाको नामको सूची बुझाए पनि कसको नाम निकालियो भन्नेबारे क्यानले सार्वजनिक गरेको छैन । क्यानको योजनाअनुसार लामिछानेको भिसा लागेमा मात्र अर्का खेलाडीको नाम थाहा हुने छ।

यदी सन्दीपको भीसा लागेमा बलरहरुमध्येबाट एक जना बैकल्पिकमा पर्ने सक्ने अनुमान गरिएको छ। हाल नेपाली टोलीमा स्पिनरहरू ललितनारायण राजवंशी, सागर ढकाल छन् भने सोमपाल कामी, करण केसी, कमलसिंह ऐरी, गुलशन झा तीव्र गतिका बलर हुन् ।त्यस्तै  'पार्ट-टाइम' स्पिनरहरूमा दीपेन्द्र सिंह ऐरी, कप्तान रोहित पौडेल, कुशल मल्ल र कुशल भुर्तेल रहेका छन् ।

अमेरिका र वेष्ट इन्डिजले संयुक्त रुपमा आयोजना गर्ने खेलमा नेपालले पहिलो खेल जुन ४ (१९ गते शनिबार) मा नेदरल्याण्डससँग खेल्ने छ। त्यस्तै जुन १२ मा श्रीलंका र जुन १५ मा दक्षिण अफ्रिकासँग खेल्ने छ। त्यस्तै जुन १७ मा नेपालको खेल बंगलादेशसँग छ । समूह चरण पार गरे त्यसपछिका खेलहरु नेपालले खेल्ने छ।