असोज १७, काठमाडौँ | काठमाडौँका एक ५० वर्षीय व्यापारी, विनोद खड्गीको अपहरणपछि फिरौती असुली गरेर हत्या गरिएको घटना काभ्रेको पाँचखालमा सार्वजनिक भएको छ। असोज ६ गते बिहान साढे ८ बजे पाँचखाल नगरपालिका-८ को ४९ किलो भन्ने स्थानमा खड्गीको शव फेला परेको थियो। जिल्ला प्रहरी काभ्रेले घटनाको अनुसन्धान गर्दै अपहरण र हत्या गरी फिरौती लिएको पुष्टि गरेको छ।
पक्राउ पर्नेमा सिन्धुपाल्चोकको सुनकोसी गाउँपालिका २ घर भई भक्तपुरको मध्यपुर ठिमीमा डेरा बस्ने २१ वर्षीया मनिषा महत, काठमाडौँको शंकरापुर नगरपालिका ५ का २२ वर्षीय सरिन घिमिरे र २१ वर्षीय निकेश पौडेल, महोत्तरीको गौशाला नगरपालिका ६ घर भई भक्तपुरको कौशलटार बस्ने आशिष पासवान र बागलुङको गलकोट नगरपालिका ७ घर भई कोटेश्वर बस्ने १९ वर्षीय प्रतिश गौतम रहेका छन्।
ती व्यवासायीलाई हनी–ट्रयापमा पारेर युवतीको कोठामा बोलाएको र अपहरण गरी ५ लाख रूपैयाँ फिरौती पनि लिएको खुलेको छ। मनिषालाई भेट्न गएका खड्गीलाई यी ५ जनाले मनिषाको कोठाबाटै अपहरण गरेको र कुटपिट गरी फिरौती रकम लिएको काभ्रेका डीएसपी मीनबहादुर घलेले जानकारी दिए।
फिरौती रकम लिइसकेपछि उनीहरूले खड्गीको हत्या गरेर शव झाडीमा फालिदिएका थिए।
यसरी भयो अपहरणपछि हत्या
असोज ६ गते बिहान साढे ८ बजे, पाँचखाल नगरपालिका ८ को ४९ किलो भन्ने ठाउँमा एक पुरुषको शव फेला पर्यो। शवको तत्काल सनाखत हुन नसके पनि, प्रहरीले सामाजिक सञ्जालमार्फत हुलिया सार्वजनिक गरी शवको पहिचान गरायो। मृतक विनोद खड्गी रहेको कुरा उनका छोरा विशाल खड्गीले सनाखत गरे र अपराधको अनुसन्धान गर्दै दोषीलाई कारबाहीको माग राख्दै जाहेरी दिए।
प्रहरीले अनुसन्धान गर्दा घटनाको कारण पत्ता लाग्यो। करिब तीन महिना अघि मनिषा, अन्सु, र शिवम् नामका व्यक्तिहरूले भारतको ग्रेटर नोइडामा तुषार नामका व्यक्तिलाई कुटपिट गरी फिरौतीको रूपमा १ लाख ५० हजार भारतीय रुपैयाँ लिएर नेपाल फर्केका थिए।
नेपाल फर्केपछि उनीहरूले मनिषा मार्फत फेरि धनी व्यक्तिलाई यौन जालमा पारेर रकम लुट्ने योजना बनाए। असोज ४ गते साँझ ५ बजे भक्तपुरको राधेराधेमा रहेको मनिषा महतको डेरामा अन्सु, शिवम्, सरिन, र रिकेश भेला भए। उनीहरूले भोलिपल्ट एक व्यवसायीलाई फसाउने योजना बनाए, जसमा रक्सी खुवाएर, खाना खुवाएपछि कुटपिट गरी हातखुट्टा बाँधेर डर देखाउँदै फिरौती रकम माग्ने योजना थियो।
असोज ५ गते, अन्सु खानले प्रतिक गौतमलाई भेटी योजना बनायो र चारजना हिमालय गेटमा भेट्ने योजना बनाए। त्यतिखेर मनिषाले विनोद खड्गीलाई फोन गरी आफ्नो नागरिकताको प्रतिलिपी बनाउन सहयोगको लागि बोलाइन्। विनोद डेढ घण्टापछि गाडीमा मनिषाको डेरामा पुगे। त्यहाँ खाना खाइसकेपछि, मनिषाले अन्सुलाई फोन गरी योजना अघि बढाइन्।
अन्सु, शिवम्, सरिन, रिकेश, प्रतिक र आशिष मनिषाको डेरामा पुगे र पूर्व योजनाअनुसार विनोदलाई कुटपिट गरे। त्यसपछि, ३० लाख रुपैयाँ फिरौती माग्ने योजना बनाए, तर विनोदले आफूले ५ लाखसम्म मात्र दिन सक्ने बताए। विनोदले प्रदीप थापा मगरलाई फोन गरी ५ लाख रुपैयाँ तुरुन्तै ल्याउन भने। साँझ प्रदीप पैसा लिएर भाटभटेनी अगाडि आए र आशिषलाई ५ लाख रुपैयाँ दिए। आशिषले पैसा मनिषाको कोठामा ल्याएपछि, उनीहरूले विनोदलाई मार्ने योजना बनाए।
राति १० बजे, उनीहरूले गाडीमा विनोदलाई राखेर गुन्डु जाने बाटोमा लगे। गाडी रोकि विनोदको छातीमा ढुंगा प्रहार गरी हत्या गरे र शवलाई पाँचखालको ४९ किलो नजिकको झाडीमा फालिदिए। त्यसपछि उनीहरू विनोदकै गाडी चढेर फरार भए।
यस बिषयमा तपाइको प्रतिक्रिया...!