फागुन १२, काठमाडौँ | बलिउडकी ‘पंगा गर्ल’ अर्थात अभिनेत्री कंगना रनौत समय– समयमा आफ्नो बोलीका कारण विवादमा परिरहन्छन् ।

बी–टाउनकी उनी एउटी त्यस्ती कलाकार हुन्, जसले आफ्नो वयानले भूकम्प ल्याउन सक्ने ताकत राख्छिन् । करण जौहर, जावेद अख्तरजस्ता दिग्गज सेलिब्रेटीहरुसंग पंगा लिइसकेकी कंगनाको निशाना अब बलिउडमा महानायकको दर्जा पाएका अमिताभ बच्चन पनि परेका छन् ।

यतिबेला कंगना रनौत अमिताभ बच्चनसंग आक्रोशित भएकी छिन् । यसक्रममा उनले अमिताभ बच्चनलाई बलिउडको माफिया समेत भन्न भ्याइन् । कंगनाका अनुसार अमिताभ बच्चन बलिउड माफिया ग्याङ्का सदस्य हुन् ।

यसपटक कंगनाले अमिताभसंग रिस देखाउने कारण भने व्यक्तिगत नभएर व्यवसायिक छ ।

आफ्नो नयाँ फिल्मको प्रदर्शन मितिकै दिन अमिताभको फिल्म पनि प्रदर्शन हुने भएपछि कंगनाले आफूलाई नियन्त्रण गर्न नसकेकी हुन् ।

आफ्नो फिल्म ‘इमर्जेन्सी’ को रिलिज डेटकै दिन अमिताभ बच्चन र टाइगर श्राफको फिल्म ‘गणपत’ रिलिज गर्ने कुराले उनी अमिताभसंग रिसाएकी हुन् ।

यहि कुराको बारेमा कंगनाले ट्वीट गर्दै लेखेकी छिन्– ‘इमर्जेन्सी फिल्मका प्रदर्शनका लागि मिति खोजिरहेको बेला यो वर्षको मूभी क्यालेण्डर सबै खाली देखेँ । हिन्दी फिल्म इन्डस्ट्रीमा देखिएको समस्याका कारण पोस्ट प्रोडक्सन टाइमलाइनको हिसाबले मैले अक्टोबर २० लाई रिलिज डेटको रुपमा छानेकी थिएँ । त्यसको एक हप्ता अगाडि मात्र टीसीरीजका सञ्चालक भूषण कुमारले उनको फिल्म रिलीज हुने घोषणा गरिदिए । अक्टोबर महिना पुरा खाली छ । त्यस्तै सेप्टेम्बर र नोभेम्बर पनि खाली छ, तर आज अमिताभ बच्चन र टाइगर श्राफले अक्टोबर २० मै आफ्नो ठूलो प्रोजेक्ट घोषणा गरे । बलिउड माफिया ग्याङमा प्यानिक मिटिङ भइरहेको जस्तो छ । जब वर्ष भरी नै खाली छ भने क्लेशको आवश्यकता किन पर्यो ? इन्डस्ट्रीको यति धेरै नराम्रो स्थिति छ, तर पनि यस्तो दुर्बुद्धि, के खान्छौ तिमिहरु सबै ? यस्तो सेल्फ डेस्ट्रक्टिभ कसरी छौ ?’

कंगनाले आफ्नो फिल्म ‘इमर्जेन्सी’ कुनै अर्को डेटमा सार्ने पनि घोषणा गरिन् । उनको ट्विटबाट उनी कति आक्रोशित छिन् भन्ने कुरा बुझ्न सकिन्छ ।

फिल्म ‘इमर्जेन्सी’ कंगना इन्दिरा गान्धीको भूमिकामा देखिँदैछिन् । कंगनाको यो फिल्म हेर्नका लागि प्रशंसकहरु उत्साहित छन् ।