जेठ ३२, काठमाडौं। बहराइनमा समस्यामा परेका नेपालीहरुलाई स्वदेश ल्याइने उडान कार्यतालिका परिवर्तन भएको छ । बहराइनमा रहेको नेपाली दुतावासले आइतबार एक सूचना जारी गर्दै असार ३ गते हुने भनिएको बहराइन-काठमाडौं उडान असार ७ गते हुने जनाएको छ ।
बहराइनबाट काठमाडौंका लागि हुने अन्य उडान बारे पछि जानकारी गराइने दुतावासले जनाएको छ ।
हेर्नुहोस् दुतावासको सूचना
ओमानबाट काठमाडौंका लागि हुने उडान तालिका पनि परिवर्तन भएको छ । ओमानबाट नेपालीको स्वदेश फिर्तीका लागि तोकिएको दोस्रो उडान तालिका तीन दिन अघि सारिएको छ । ओमानमा रहेको नेपाली दूतावासले यसअघि जुन २१ अर्थात असार ७ गतेको लागि तोकिएको उडान तीन दिनअघि सारेर जुन १८ अर्थात असार ४ गते हुने भएको छ । यो उडानमार्फत १८० जना नेपाली स्वदेश फर्कंदै छन् ।
साउदी र माल्दिभ्सबाट हुने उडान रद्ध
असार १ गतेदेखि साउदीबाट नेपाली लिएर आउने तय भएको पहिलो उडान रद्द गरिएको छ । असार १ गते हिमालय एअरले साउदीको दमामबाट त्यहाँ समस्यामा परेका नेपालीको स्वदेश फिर्तीका लागि तय भएको चार्टर्ड उडान रद्द भएको साउदीमा रहेको नेपाली दूतावासले जनाएको छ । पहिलो उडान नै अर्को सूचना जारी नहुँदासम्मका लागि स्थगित भएको छ ।
उडान स्थगित भएपछि स्वदेश फर्कने प्राथमिकतामा परेकाहरुलाई कोरोना परीक्षण नगर्न दूतावासले अनुरोध गरेको छ । उडान किन रद्द भयो भन्ने बारे खुलाइएको छैन । यस्तै असार १ गते नै माल्दिभ्सबाट त्यहाँ समस्यामा परेका नेपालीको स्वदेश फिर्तीका लागि हुने निश्चित भएको उडान पनि रद्द भएको छ ।
यस बिषयमा तपाइको प्रतिक्रिया...!