असार २६, काठमाडौँ । रुपन्देहीका प्रमुख जिल्ला अधिकारी (सीडीओ) गणेश अर्यालको पहलमा साउदी अरबमा फाँसीको सजाय कुरेका रामआशिष यादवले उन्मुक्ति पाउने भएका छन् ।
रामआशिषले सँगै एउटै कोठामा बस्ने रुपन्देहीको कञ्चन गाउँपालिका- ४ का दुर्गाप्रसाद शर्मालाई विवादको क्रममा छुरा प्रहार गरेका थिए । दुर्गाप्रसादको घटनास्थलमै मृत्यु भएको थियो । सोही हत्यामा रामआशिषलाई ५ वर्षको जेल सजाय तोकियो । ५ वर्षपछि दुवै जनाको परिवारको बीचमा ब्लड मनीमा सम्झौता नभए अन्तिम विकल्प फाँसीमा जाने अदालतको फैसला थियो ।
अदालतले फैसला गरेको पाँच वर्ष केही महिनामा पुग्दै थियो। तर अदालतको समयभित्रै मृतकका परिवारलाई ब्लडमनी बुझ्न सहमत गराउनुको साथै ब्लडमनी वापत ४६ लाख २५ हजार रुपैयाँ संकलन गरी बुझाएपछि रामआशिष यादवको मृत्युदण्ड मिनाहा हुने भएको छ।
घटनाक्रम अनुसार धनुषाको जनकपुरधाम उपमहानगरपालिका–१७ का रामआशिष यादवका तीन छोरी, आमा–बुबासहित ६ जनाको परिवार थियो । घर चलाउन गाह्रो भएको भन्दै रामअशिष २९७४ मा साउदी अरब पुगे । उनीसँगै रुपन्देहीको कञ्चन गाउँपालिका–४ का दुर्गाप्रसाद शर्मा पनि साउदी अरब गएका थिए ।
उनीहरूले खाने, रमाउने थलो पनि एउटै थियो । २०१८ को अक्टोबर ६ तारिखमा कोठामै खानपान गरेर रमाइरहेकै बेला उनीहरुबीच सामान्य विवाद भयो । त्यस क्रममा रामआशिषले दुर्गालाई छुरा हाने । दुर्गाको घटनास्थलमै ज्यान गयो ।
हत्या अभियोगमा रामआशिष पक्राउ परे । साउदीको ताबुक क्रिमिनल कोर्टले सन् २०२० को २० डिसेम्बरमा राम आशिषलाई ५ वर्ष कैद सजायको फैसला गर्यो । ५ वर्षपछि दुवै जनाको परिवार बीच ब्लडमनीमा सम्झौता नभए फाँसी दिने फैसला आयो ।
यो खबरले दुवै जनाको घरपरिवारमा बज्रपात भयो । एक जनाको ज्यान गयो । कमाउन विदेश गएका दुर्गा मारिए । रामआशिष पनि जेल परे । अझ पाँचवर्षपछि त उनलाई पनि मृत्यूदण्ड हुँदै थियो । विपन्न आर्थिक अवस्थाको कारण रामआशिषकी श्रीमती रेनुकुमारीले बल्लतल्ल तीन छोरीसहित गुजारा गर्दै आइरहेकी छन् । विपन्नताको कारण छोरीसमेत पढाइबाट वञ्चित छन् ।
अब भने साउदीमा फाँसीको सजाय सुनाइएका रामआशिषको परिवारले पीडित पक्षसँग मिलापत्र गरेका छन् । पाँचवर्षदेखि जेलमा रहेका उनी घर फर्किने भएका छन् । पीडित पक्ष दुर्गाको परिवारले ब्लडमनीवापत् ५० लाख रुपैयाँ लिएर माफी दिन सहमत भएपछि यादवको ज्यान जोगिने निश्चित भएको हो ।
सम्पत्तिको नाममा झन्डै एक कठ्ठा मात्र घरघडेरी रहेको रामआशिषको परिवारलाई ब्लडमनीवापत् ५० लाख रुपैयाँ जुटाउनु असम्भव जस्तै थियो । रुपन्देहीका प्रमुख जिल्ला अधिकारी गणेश अर्यालले नै ब्लड मनी संकलन गर्दै मृतकका परिवारसँग मिलापत्र गराउने अभियानको सुरु गरेका थिए । उनकै रोहबरमा दुर्गाकी श्रीमती सीतालाई हस्तान्तरण गरिएको छ ।
दुवै पक्षबीच सहमति भएसँगै रामआशिषले मृत्युदण्डबाट छुटकारा पाउने निश्चित भएको प्रजिअ अर्यालले बताए । ब्लडमनी पाएपछि रामआशिष र मृतक दुर्गाप्रसादको परिवारबीच भएको सम्झौताको कागजात कन्सुलर विभागमा पुग्नेछ । त्यहाँबाट साउदी पठाइने छ । त्यसपछि अदालतमा पुगेपछि रामआशिषले छुटकारा पाउनेछन् ।
आशा मारिसकेका पतिलाई रुपन्देहीका प्रजिअ र व्यवसायीले जीवनदान दिन पहल गरेको भन्दै रामआशिषकी श्रीमती रेनुकाले पनि खुसीका आँसु झारिन् । उनले प्रमुख जिल्ला अधिकारी गणेश अर्याललाई भनिन्, ‘‘मेरो श्रीमान् फाँसीको सजायबाट उम्कन सक्ने थिएनन् । हाम्रो परिवारको लागि सिडिओ साब भगवान् हो ।’’
सबै प्रक्रिया छिटो भएमा करिब एक महिनापछि रामआशिष घर फर्किनेछन् । रुपन्देहीका प्रमुख जिल्ला अधिकारीको सकृयतामा करिब ३० जना उद्योगी ब्यावसायीको सहयोगमा रकम संकलन गरेको सिद्धार्थनगर उद्योग वाणिज्य संघका अध्यक्ष ठाकुरकुमार श्रेष्ठले बताए ।
यस बिषयमा तपाइको प्रतिक्रिया...!