असार १४, काठमाडौँ । सन् २०२४ को टी–२० विश्वकपको फाइनलको सम्पूर्ण तयारी पूरा भएको छ ।
भारत र दक्षिण अफ्रिकाबीचको ब्लकबस्टर उपाधि भिडन्त वेस्ट इन्डिजको केन्सिङ्टन ओभलमा नेपाली समयअनुसार शनिबार बेलुका ८:१५ बजे सुरु हुनेछ ।
मैदानमा दुई अजेय टोलीहरू बीचको भिडन्त देखिनेछ तर, यो खेल अघि विभिन्न चासोहरू फ्यानहरूको मनमा उठेको छ ।
उदाहरणका लागि पिच कस्तो छ ? दुवै टोलीको प्लेइङ इलेभेन कस्तो हुनेछ ? सबैभन्दा ठूलो प्रश्न मौसमको प्रकृति कस्तो हुनेछ ?
बिहीबार राति भएको भारत र इंग्ल्याण्डबीचको सेमिफाइनल खेलमा वर्षाले दु:ख दिएको थियो । एक समय खराब मौसम र भिजेको आउटफिल्डका कारण खेल रद्द हुन सक्छ भन्ने लाग्थ्यो, तर भाग्यवस फ्यानहरूले पूरै २०/२० ओभरको खेल हेर्न पाएका थिए ।
बार्बाडोसमा हुने फाइनलमा मौसमको पूर्वानुमान के छ ?
अबको केही दिन देशभर वर्षाको सम्भावना रहेको छ । तालिकाअनुसार शनिबार फाइनल खेल र आइतबार (रिजर्व डे)मा पनि भारी वर्षाको सम्भावना रहेको अन्तराष्ट्रिय सञ्चारमाध्यमले जनाएका छन् ।
ब्रिजटाउन, बार्बाडोसको लागि पछिल्लो मौसम पूर्वानुमानले त्यहाँ आँधीबेरीका साथ वर्षाको सम्भावना रहेको छ । साथै, दिनभर आकाशमा बादल लाग्ने अनुमान गरिएको छ । शनिबार पानी पर्ने सम्भावना ७८ प्रतिशत छ ।
दिनभर पानी पर्यो भने के हुन्छ ?
दोस्रो सेमिफाइनलमा रिजर्भ डे नभए पनि आईसीसीले फाइनलका लागि त्यस्तो गरेको छैन । उपाधि खेलका लागि रिजर्भ डे घोषणा गरिएको छ ।
वर्षा, खराब मौसम, आउटफिल्ड भिज्ने वा अन्य कुनै कारणले शनिबार (जुन २९)मा खेल सम्पन्न हुन सकेन भने भोलिपल्ट अर्थात् जुन ३० गते सम्पन्न हुनेछ ।
रिजर्भ डेमा पनि पानी परे वा नतिजा घोषणा नभए दुवै टोली संयुक्त विजेता घोषित हुनेछन् ।
अर्को विश्वकप भारत-श्रीलंकामा हुने
अन्तर्राष्ट्रिय क्रिकेट काउन्सिलले भर्खरै भारत र श्रीलंकाले संयुक्त रूपमा आयोजना हुने टी-२० विश्वकप २०२६ को लागि योग्यता प्रक्रियालाई पनि स्वीकृत गरेको छ।
सन् २०२४ जस्तै टी-२० विश्वकप २०२६ मा २० टोली सहभागी हुनेछन्, जसका लागि अहिले नै १२ टोली छनोट भएका छन् । सूचीमा सुपर-८ मा पुग्न असफल भएका पाकिस्तान, श्रीलंका र न्युजिल्यान्डको नाम पनि छ । आईसीसीको वरियतालाई आधार मानेर यी तीन टोली सिधै छनोट भएका हुन् ।
अर्कोतर्फ भारत र श्रीलंका सहआयोजक भएकाले स्वतः छनोट भएका छन् ।
यसपछि बाँकी आठ स्थानको टुंगो आईसीसी क्षेत्रीय छनोटबाट हुनेछ ।
छनोट हुने देशहरु-
आयोजक
भारत
श्रीलंका
सुपर–८ मा पुगेका
अस्ट्रेलिया
अफगानिस्तान
बंगलादेश
इंग्ल्याण्ड
दक्षिण अफ्रिका
संयुक्त राज्य अमेरिका
वेस्ट इन्डिज
वरीयताका आधारमा
आयरल्याण्ड
न्युजिल्याण्ड
पाकिस्तान
यस बिषयमा तपाइको प्रतिक्रिया...!