असोज २५, काठमाडौँ | आईसीसी एकदिवसीय विश्वकपमा बिहीबार दुई बलिया टेष्ट राष्ट्र अस्ट्रेलिया र दक्षिण अफ्रिकाबिच भिडन्त हुँदै छ । लखनउमा खेलिने उक्त दिवा—रात्रि खेल नेपाली समयअनुसार, दिउँसो २ः१५ बजे सुरु हुनेछ ।

अस्ट्रेलिया र दक्षिण अफ्रिकाबिचको उक्त भिडन्तसँगै जारी विश्वकपमा दोस्रो चरणको खेल पनि सकिने छ । जारी विश्वकपको आफ्नो पहिलो खेलमा दक्षिण अफ्रिका विजयी भएको थियो भने अस्ट्रेलियाले हार भोगेको थियो । 

दक्षिण अफ्रिकाले आफ्नो पहिलो खेलमा श्रीलङ्कालाई एक सय दुई रनले हराएको थियो । अस्ट्रेलिया भने आफ्नो पहिलो खेलमा आयोजक राष्ट्र भारतसँग ६ विकेटले पराजित भएको थियो । त्यसैले बिहीबार हुने खेलमा अस्ट्रेलिया पहिलो जितको खोजीमा हुनेछ भने दक्षिण अफ्रिका दोस्रो सफलताको प्रयासमा ।

अन्तर्राष्ट्रिय क्रिकेट काउन्सिल (आईसीसी)द्वारा जारी गरिएको पछिल्लो एकदिवसीय वरीयतामा अस्ट्रेलिया तेस्रो र दक्षिण अफ्रिका चौथो स्थानमा छन् । एकदिवसीय विश्वकपमा अस्ट्रेलियाको १३औँ सहभागिता हो भने दक्षिण अफ्रिकाको नवौँ ।

एकदिवसीय विश्वकपमा उपलब्धिको हिसाबले भने दक्षिण अफ्रिकाभन्दा अस्ट्रेलियाली टोली निकै बलियो देखिन्छ । अस्ट्रेलियाले सर्वाधिक पाँच पटक एकदिवसीय विश्वकपको उपाधि जितेको छ । अस्ट्रेलियाले सन् १९८७, सन् १९९९, सन् २००३, सन् २००७ र सन् २०१५ मा विश्वकप जितेको थियो ।

यसदेखि बाहेक अस्ट्रेलिया सन् १९७५ र सन् १९९६ मा विश्वकपको फाइनलसम्म पुगेको थियो । तर, दक्षिण अफ्रिकाले हालसम्म विश्वकपको उपाधि उचाल्न सकेको छैन । दक्षिण अफ्रिका हालसम्म विश्वकपको फाइनलसम्म पनि पुग्न सकेको छैन ।

एकदिवसीय विश्वकपमा दक्षिण अफ्रिकाको सबैभन्दा ठूलो उपलब्धि भनेको सेमिफाइनल हो । यो अफ्रिकी राष्ट्र सन् १९९२, सन् १९९९,  सन् २००७ र सन् २०१५ मा एकदिवसीय विश्वकपको सेमिफाइनलमा पुगेको थियो । 

अर्कोतिर, यी दुई राष्ट्रबीच हालसम्म खेलिएको एकदिवसीय अन्तर्राष्ट्रिय प्रतियोगिताको तथ्याङ्कलाई हेर्दा भने अस्ट्रेलियाभन्दा दक्षिण अफ्रिका केही बलियो देखिन्छ । हालसम्म यी दुई राष्ट्रले आपसमा एक सय आठवटा एकदिवसीय अन्तर्राष्ट्रिय प्रतियोगिता खेलेका छन् । 

त्यसमध्ये ५४ खेलमा दक्षिण अफ्रिकाले अस्ट्रेलियालाई हराएको छ । ५० वटा खेलमा अस्ट्रेलियाले दक्षिण अफ्रिकालाई पराजित गरेको छ । यी दुई राष्ट्रबीचको एक खेल अनिर्णीत रूपमा सकिएको छ भने तीन खेल बराबरीमा टुङ्गिएको छ ।