असोज २४, काठमाडौं | आईसीसी एक दिवसीय विश्वकपमा बुधबार आयोजक राष्ट्र भारतले तुलनात्मक रूपमा कमजोर प्रतिद्वन्द्वी अफगानिस्तानको सामना गर्दैछ । उक्त खेल दिल्लीस्थित अरुण जेट्ली स्टेडियममा खेलाइने छ । दिवा—रात्रि खेल नेपाली समयअनुसार, दिउँसो २ः१५ बजे सुरु हुनेछ । 

अन्तर्राष्ट्रिय क्रिकेट काउन्सिल (आईसीसी) को पछिल्लो एक दिवसीय वरीयतामा भारत पहिलो स्थानमा छ भने अफगानिस्तान नवौँ स्थानमा रहेको छ । विश्वकपमा भारतको यो १३औँ सहभागिता हो भने अफगानिस्तानले तेस्रो पटक विश्वकप खेलेको हो । 

अफगानिस्तानले यसअघि सन् २०१५ र सन् २०१९ को विश्वकपमा सहभागिता जनाएको थियो । ती दुवै विश्वकपमा अफगानिस्तान समूहगत चरणबाटै बाहिरिएको थियो । यसको विपरीत भारत भने दुई पटकको विश्वकप विजेता राष्ट्र हो ।

भारतले सन् १९८३ मा पहिलो र सन् २०११ मा दोस्रो पटक एक दिवसीय विश्वकपको उपाधि चुमेको थियो । जारी विश्वकपमा पनि भारतले पहिलो खेलमा उत्कृष्ट प्रदर्शन गरेको थियो । पहिलो खेलमै पाँच पटकको विश्व च्याम्पियन अस्ट्रेलियालाई ६ विकेटले हराएपछि भारतको मनोबल उच्च बनेको छ ।

यद्यपि, प्रभावशाली युवा ओपनर शुभमन गिल भने अफगानिस्तानविरुद्धको खेलमा पनि टोलीमा सहभागी हुने छैनन् । पछिल्लो समय विभिन्न अन्तर्राष्ट्रिय प्रतियोगितामा ओपनर ब्याट्सम्यानका रूपमा भारतलाई उत्कृष्ट सुरुआत दिँदै आएका गिललाई विश्वकप सुरु हुनुअघि डेङ्गु सङ्क्रमण भएको थियो । 

त्यसैले अस्ट्रेलियाविरुद्धको खेलमा पनि गिल अनुपस्थित थिए । पछिल्लो केही समययता ओपनरको भूमिकामा भारतीय कप्तान रोहित शर्माले गतिलो प्रदर्शन गर्न सकिरहेका छैनन् । अस्ट्रेलियाविरुद्धको खेलमा पनि भारतका दुवै ओपनर शर्मा र इशान किशन शून्य रनमै पेभेलियन फर्किएका थिए ।

त्यसपछि पूर्वकप्तान विराट कोहली र विकेटकिपर ब्याट्सम्यान केएल राहुलले भारतको पालीलाई समालेका थिए । कोहलीले ८५ र राहुलले अविजित ९७ रन बनाएका थिए । भारतीय बलरहरु भने लयमा देखिएका छन् । 

अस्ट्रेलियाविरुद्धको खेलमा रविन्द्र जडेजाले तीन तथा कुलदिप यादब र जसप्रित बुमराहले दुई—दुई विकेट लिएका थिए । अर्कोतिर, अफगानिस्तान भने आफ्नो पहिलो खेलमा बंगलादेशसँग ६ विकेटले पराजित भएको थियो ।

पहिले ब्याटिङ गरेको अफगानिस्तान ३७.२ ओभरमै केवल एक सय ५६ रनमा अलआउट भएको थियो । अफगानिस्तानका कुनै पनि ब्याट्सम्यान लामो समय क्रिजमा टिक्न सकेका थिएनन् । ओपनर रहमनुल्लाह गुरबाजले सर्वाधिक ४७ रन बनाएका थिए । 

भारत अन्तर्राष्ट्रिय क्रिकेटमा निकै अनुभवी टेस्ट राष्ट्र हो । यसको विपरीत अफगानिस्तान भने लामो समयदेखिको युद्धको विभिषिकाबाट समालिएर अन्तर्राष्ट्रिय क्रिकेटमा ठूला उपलब्धिहरु हासिल गर्न सँघर्ष गरिरहेको राष्ट्र हो । 

यद्यपि, पछिल्लो समय अन्तर्राष्ट्रिय क्रिकेटमा अफगानिस्तानले उत्कृष्ट प्रदर्शन गर्दै आएको छ । छोटो समयमा अन्तर्राष्ट्रिय क्रिकेटमा हासिल गरेको उपलब्धिका कारण अफगानिस्तानको टोलीको मनोबल भने निकै उच्च देखिन्छ । 

जारी विश्वकपमा अफगानिस्तानलाई उपाधिको दाबेदारका रूपमा हेरिएको छैन । तर, केही खेलमा अप्रत्यासित नतिजा निकाल्दै बलिया टोलीहरुको यात्रामा भने अवरोध सृजना गर्न सक्ने क्षमता अफगानिस्तानको टोलीमा देखिन्छ ।

भारत र अफगानिस्तानले हालसम्म आपसमा तीनवटा एक दिवसीय अन्तर्राष्ट्रिय प्रतियोगितामात्र खेलेका छन् । त्यसमध्ये दुई खेलमा भारतले पाकिस्तानलाई हराएको छ । भारत र पाकिस्तानबीचको एउटा खेल भने बराबरीमा सकिएको छ । 

भारतले एक दिवसीय क्रिकेटमा दुवैपटक अफगानिस्तानलाई ‘न्यूट्रल भेन्यू’ मा हराएको हो । भारत र अफगानिस्तानबीच सन् २०१८ को सेप्टेम्बर २५ मा खेलिएको खेल बराबरीमा सकिएको थियो । त्यो खेल एसिया कपको ‘सुपर फोर’ चरणमा खेलिएको थियो । 

त्यो खेलमा अफगानिस्तानले टस जिती पहिले ब्याटिङ गर्दै निर्धारित ओभरमा आठ विकेट गुमाएर दुई सय ५२ रन बनाएको थियो । जवाफी ब्याटिङमा ओर्लिएको भारतले पनि ४९.५ ओभरमा अलआउट हुनुअघि दुई सय ५२ रन नै बनाएको थियो । 

एक दिवसीय क्रिकेटमा अफगानिस्तानविरुद्ध भारतले बनाएको उच्च स्कोर दुई सय ५२ रन नै हो । भारतले बनाएको सबैभन्दा कम स्कोर भने आठ विकेट गुमाएर दुई सय २४ रन हो । भारतविरुद्ध अफगानिस्तानले बनाएको सबैभन्दा ठुलो स्कोर दुई सय ५२ रन हो भने सबैभन्दा कम स्कोर एक सय ५९ रन हो । 

यसैगरी अफगानिस्तानविरुद्ध उच्च स्कोर बनाउने भारतीय ब्याट्सम्यान विराट कोहली हुन् । उनले ६३ बलमा ६७ रन बनाएका छन् । भारतविरुद्ध उच्च स्कोर बनाउने अफगानिस्तानका ब्याट्सम्यान भने मोहम्मद सहजाद हुन् । उनले एक सय १६ बलमा एकसय २४ रन बनाएका छन् । 

यसैगरी अफगानिस्तानविरुद्ध एक दिवसीय खेलमा उत्कृष्ट बलिङ गर्ने भारतीय बलर रविन्द्र जडेजा हुन् । उनले एउटै खेलमा ३० रन खर्चिएर चार विकेट लिएका छन् । भारतविरुद्ध उत्कृष्ट बलिङ गर्ने अफगान बलर भने मोहम्मद नाबी हुन् । उनले ३३ रन खर्चिएर दुई विकेट लिएका छन् ।