दलसिंह गिरी/माघ २१, कालिकोट । कर्नालीको पहिचानको रुपमा रहेको स्थानीय रैथाने बाली चिनो, फापर, कागुनो, सिमी लगायतका बालीहरु खेती हराउन थालेको भन्दै यसको संरक्षण तथा प्रवर्धन गर्न आवाज उठिरहेका बेला नेपाल खाध्य संस्थाले यसको बजार प्रवर्धनका लागि स्थानीय बाली खरिद गरी बाह्य जिल्लाहरुमा विक्रि वितरण गर्न थालेको छ । 

नेपाल खाध्य संस्थानको खरिद अभियान अनुसार कालिकोट जिल्लाबाट आचु आर्थिक बर्ष २०७३/०७४को पौष मसान्त सम्ममा मात्र करिव १ सय क्वीन्टल फापर र करिव १ सय ७० क्वीन्टल सिमि खरिद गरी बाह्य जिल्लामा निर्यात गरेको जिल्ला खाध्य संस्थानका प्रमुख अनिल कुमार श्रेष्टले बताउनु भएको छ ।

कर्नालीको स्थानीय रैथाने बालीको बजार प्रबर्धन गरी उत्पादनमा कृषकहरुलाई उत्प्रेरित गराउने उद्देश्यले संस्थानले यस्तो अभियान थालेको श्रेष्टले बताउनु भएको हो । जिल्लामा उत्पादित २ वटा बाली फापर र सिमीमा फापर प्रति केजी ८० रुपैया र सिमी प्रति केजी १ सय २५ रुपैयामा खरिद गरी बाह्य जिल्लामा निर्यात गर्ने काम भएको श्रेष्टले बताउनु भएको छ ।

यता जिल्ला कृषि विकास कार्यालय कालिकोटले जिल्लाबाट निर्यात हुने सिमी र फापरहरुमा यो बर्ष के कति निर्यात भयो यसबारे एकिन तथांक नआईसकेको जनाएको छ । गत बर्षको तथांक अनुसार फापर १५ क्वीन्टल र सिमी करिव २० क्वीन्टल बाह्य जिल्लामा निर्यात भएको बताउदै जिल्ला कृषि विकास कार्यालयका बाली फोकल कल बहादुर शाहीले यस्तो कुरा बताउनु भएको हो ।

विशेष जिल्लामा उत्पादन हुने फापर खिन, धौलागोह, फोइमहादेव, राचुली चिलखाया लगायतका क्षेत्रमा उत्पादन हुने गरेको र सिमी जिल्लाका प्राय सबै गाविसमा उत्पादन हुने गरेको शाहीले बताउनु भएको छ । 

सिमी र फापर बाली कर्नाली बाहेक अन्य जिल्लामा उत्पादन हुने भएपनि कर्नालीमा उत्पादन अर्गानिक हुने भएको भन्दै काठमाडौं, पोखरा लगायतका सहरहरुमा यसको माग ह्वात्तै बढेको बाली फोकल शाहीले बताउनु भएको छ ।