माघ ९, कालिकोट । जिल्लामा संचालित स्वास्थ्य संस्थाबाट निशुल्क उपलब्ध हुने कुनैपनि औषधी अभाव नरहेको जिल्ला स्वास्थ्य प्रमुख कौशल अलिले जिकिर गर्नु भएको छ । 

जिल्ला अस्पतालबाट पाईने ७० प्रकार, प्राथमिक स्वास्थ्य केन्द्रबाट पाईने ५८ प्रकार र स्वास्थ्य संस्थाबाट पाईने ३५ प्रकारको निशुल्क औषधी हाल जिल्लामा २ महिना सम्म पुग्ने गरी मौजुदा रहेको समेत जिकिर गर्नु भएको छ ।

जिल्लामा औषधी आपूर्तिका लागि स्वास्थ्य विभाग तथा औषधी ब्यवस्थापन महाशाखाले ७० प्रतिशत, क्षेत्रिय स्वास्थ्य निर्देशनालयले १० प्रतिशत र जिल्ला स्वास्थ्यले २० प्रतिशत औषधी खरिद गरी ब्यवस्थापन गर्न पर्ने ब्यवस्था भएपनि केन्द्र तथा क्षेत्रमा औषधी खरिद तथा आपूर्तिमा केही घोटाला भएको भन्दै अक्तियारले गरेको छानविनका कारण टेन्डर प्रक्रिया ढिलाई भएपनि जिल्लाका लागि आउने बजेट र स्वास्थ्य मन्त्रालय तथा अन्य निकायबाट प्राप्त आर्थिक श्रोतबाट औषधी आपूर्ति भैरहेको स्वास्थ्य प्रमुख अलिले जिविर गर्नुभयो । 

जिल्ला स्वास्थ्य कार्यालयमा केही हद सम्म औषधी भएपनि ग्रामिण भेगका स्वास्थ्य संस्थामा औषधी पाईदैन भन्दै स्थानीय वासीहरुको गुनासो किन आउछ भन्ने पत्रकारहरुको जिज्ञासाबारे बोल्दै स्वास्थ्य प्रमुख अलिले पहिलोकुरा स्थानीय वासीलाई स्थानीय स्वास्थ्य संस्थाबाट निशुल्क पाईने औषधी यो–यो हो भनि बुझाउन नसक्नु, र स्थानीय स्वास्थ्य कर्मीले पनि स्वास्थ्य संस्थामा कम्तिमा ५ बढी आईटमको औषधी नसकिए सम्म जिल्लाबाट औषधी माग नगर्नुले कहिलेकाही त्यस्तो गुनासो आएको बताउनु भएको छ ।

अझैपनि औषधी खरिदका लागि जिल्ला स्वास्थ्यमा करिव ७ लाख ९३ हजार बजेट मौजुदा रहेको र स्वास्थ्य मन्त्रालयबाट समेत थप बजेट माग गरि विनियोजन भैसकेकाले अक्तियारी आउदासाथ एक महिना भित्रै टेन्डर आह्वान सहित औषधी आपूर्तिगरी चालु आर्थिक बर्ष सम्मका लागि कुनै समस्या आउन नदिने प्रतिवद्धता समेत प्रमुख अलिले गर्नु भएको छ ।