भाष्कर केसी/मङ्सिर १०, कञ्चनपुर । आशन्न प्रदेश सभा र प्रतिनिधी सभा निर्वाचनको मिति नजिकिदै जाँदा वाम गठबन्धनले चुनाव प्रचार बहुमुखी शैलीमा अघि बढाएको छ । 

वामले कञ्चनपुरका तीनै निर्वाचन क्षेत्रमा चुनावी अभियान तिव्र रुपमा अघि बढाएको छ । निर्वाचन क्षेत्र नम्बर १ बेल्डाँडीमा घरदैलो संगै कोण सभा गरेको छ । 

नेकपा एमाले बेल्डाँडीका युवा नेता शंकर दत्त भट्टले बेल्डाँडी गाउँपालिका २, ३, र ४ मा घरदैलो कोण सभा र ३ नम्बर वडामा महेन्द्र विष्टको संयोजकत्वमा प्रचार प्रसार समिति गठन गरिएको छ । 

उप संयोजकमा नरेन्द्र विष्ट रहेका छन् । बेल्डाँडीका विभिन्न क्षेत्रमा आयोजित कोण सभामा प्रदेश सभा सदस्यका उम्मेदवार कुलबिर चौधरी, एमाले नेता पल्लवराज भट्ट, एमाले नेता अक्कल विष्ट, नन्दकिशोर एसकेले स्थिर सरकार र दक्षिणी क्षेत्रको दिगो विकासका लागि वाम उम्मेदवार सघाउन आग्रह आब्हान गरेका छन् ।  

लालझाँडी गाउँपालिका ४ र ५ मा पनि वामका उम्मेदवार तारालामा तामाङ्गले घरदैलो गरेका छन् । एमाले शंकरपुरका नेता अम्मर सिह रानाले वामले जिते सम्पूर्ण राना समुदायको हक अधिकार सुनिश्चित गराउनुका साथै प्रदेशको विकास गर्ने बचन दिएका छन् । वामले बेल्डाँडी, बेलौरी र पुर्नवास क्षेत्रका विभिन्न बस्तीमा चुनावी प्रचार तथा मतदाता शिक्षा अभियान समेत गरेको छ । 

यस्तै निर्वाचन क्षेत्र नम्बर २ मा वामका उम्मेदवार त्रय नर बहादुर धामी, लाल बहादुर खडकाले बेदकोट, कृष्णपुर शुक्लाफाँटा क्षेत्रमा घरदैलो गरेका छन् । माओवादी केन्द्रका नेता दिपक खत्रीका अनुसार कृष्णपुर ८, ९ र शुक्लाफाँटा ११ मा कोण सभा घरदैलो गरिएको छ । 

कोण सभामा वाम प्रतिनिधी सभा सदस्यका उम्मेदवार नर बहादुर धामीले निर्वाचन क्षेत्र नम्बर २ को बषौँदेखिको जमिनको लालपुर्जाको समस्या र सडक सुधारमा आफ्नो पहिलो प्रथमिकता रहेको बताएका छन् । कोण सभामा धामीले सर्व प्रथम यस क्षेत्रको लामो समयदेखि किसानले जमिनको लालपुर्जा नपाएको समस्या तत्त्काल समाधान गर्ने उद्घोष तथा बचन दिएको एमाले नेता अम्मर धामीले बताए । 

उनका अनुसार उम्मेदवार धामीले जनताको समस्यामा हदैसम्मको मेहनत गरेर काम गर्ने प्रतिबद्धता जाहेर गरेका छन् । माओवादी नेता खत्रीले कञ्चनपुरका विभिन्न स्थानमा वामका झण्डा च्यातिएको प्रति गम्भिर आपत्ति प्रकट गरेका छन् । हार्ने मानसिकताबाट अत्तालिएर झण्डा च्यातेको उनको भनाई छ । यस्तै प्रदेश २ (ख) वामका उम्मेदवारले बेदकोट र शुक्लाफाँटा क्षेत्रमा घरदैलो भेटघाट गरेको एमाले नेता रामचन्द्र रेग्मीले बताए । उनका अनुसार लाल बहादुर खडकाले कालगौडी लगायतका बस्तीमा भेटघाट गरेका छन् । 

भने बेदकोटको ४, ५ र ९ मा युवा भेला, १ मा महिला भेला गरि मतदातालाई शिक्षा प्रदान गरिएकोछ  । यस्तै विकास बमको संयोजकत्वमा स्वयम सेवक समेत गठन गरिएको एमाले नेता रेग्मीले बताए । 

उनका अनुसार निर्वाचनलाई निष्पक्ष भयरहित वातावरणमा सम्पन्न गर्नका लागि वामका युवाले सकृय भूमिका निर्वाह गर्ने छन् । निर्वाचन क्षेत्र नम्बर ३ मा पनि वामले महाकाली र भीमदत्तका विभिन्न वडाहरुमा युद्धस्तरमा चुनावी सभा, भेटघाट, घरदैलो, कोण सभा गरेका छन् । 

माओवादी केन्द्रका नेता कृष्ण दत्त जोशी (बोक्सर) ले ३ का उम्मेदवार त्रय डा. दिपक प्रकास भट्ट, मान बहादुर सुनार र प्रकास रावल लगायतका वामका नेता कार्यकर्ताले घरदैलो गरेका छन् । 

उनका अनुसार भीमदत्त छ, १७, महाकाली ६, ८ मा घरदैलो कोण सभा चुनावी कार्यक्रम गरेका छन् । वाम ३ का उम्मेदवार त्रय भट्ट, सुनार र रावलले स्थिर जनमुखी सरकार र यस क्षेत्रको दिगो विकास र सम्बृद्धिका लागि वामका उम्मेदवारलाई भोट दिन आब्हान गरेका थिए । 

वामका उम्मेदवार त्रयले पटक पटक एकै पार्टी व्यक्तिलाई जिताएर पार्टी भित्रको लोकतन्त्रको खिल्ली उडाईएको ब्यङग्य गर्दै लोकतान्त्रिक पद्दतीको विकासका लागि आफुबाटै शुरुवात गर्नुपर्ने विचार व्यक्त गरेका थिए ।