जेठ ८, काठमाडौँ | जग्गा किनबेचमा सेवाग्राही ठगिएको गुनासो बढेपछि सरकारले काठमाडौं उपत्यकामा जग्गा किनबेच गर्दा विशेष सावधानी अपनाउन आग्रह गरेको छ । सरकारको मातहतमा रहेको उपत्यका विकास प्राधिकरणले सार्वजनिक सूचना जारी गर्दै काठमाडौंमा जग्गा खरिद गर्दा पैसा फस्ने संभावाना हुने भन्दै १२ प्रकारका जग्गा खरिदविक्री नगर्न आह्वान गरेको हो । यसका साथै प्राधिकरणले जग्गा खरिदगर्दा कस्ता कस्ता कुरामा विशेष ध्यान पुर्‍याउनु पर्छ भनेर पनि उल्लेख गरेको छ । 

यस्तो छ सरकारका औँल्याएको समस्या र सुझाव 

१.फिल्डमा मात्र होइन, नापी नक्सामा सार्वजनिक बाटो कायम गरेको छ, छैन ? नापी र मालपोत कार्यलयमा चेकजाँच गर्नुपर्ने । 

२.राजकूलो,खोल्सी ढाकेर, छोपेर, मचेर बाटो कायम गरिएको छ/छैन  र यसरी बनाइएका बाटोहरू गैरकानुनी हुने । 

३.जग्गा खोला किनार भित्रको हो हैन ? जग्गा फिल्डमा एकतिर देखाइने नापी नक्सामा अन्यत्र भएर दुख पाएका घटनाहरू प्रसस्त छन् । 

४.ढिस्को भासेर, पुरुवा माटोले सम्याइएको जग्गा हो होइन ? 

५.सार्वजनिक जग्गा मिचेर फिल्डमा बाटो कायम गरिएको प्लट ठूलो देखिई झुक्याइएको हुनसक्ने ? 

६.जमिन भासिनेरबग्ने डर छ छैन ? भूक्षय भूस्खलनका कारण घरजग्गा नै भासिएका दुखद् घटनाहरू प्रसस्तै छन् । 

७.सडक मापदण्डअनुसार बाटो विस्तारभित्र पर्ने नपर्ने ?

८.निर्देशित जग्गा विकास कार्यक्रम जीएलडी अन्तर्गत प्रस्तावित सडक रेखाङकनभित्र पर्ने नपर्ने? 

९.उच्च भोल्टेजका विजुलीका तार मुनि परे नपरेको हेर्ने ।

१०.दलदले  र गहिरो खेत पुरेर घडेरी बनाइएको रहेछ भने त्यस्तो ठाउँमा भूकम्पको कम्पन (धक्का) बढी हुन्छ । यस्तो ठाउँमा बनाइने घरहरू माटो परीक्षण गरी विशेष खाले जग हाल्नुपर्ने हुन्छ । नहालेमा आफ्ना परिवार र छिमेकी समेतको जीउ ज्यानको सुरक्षा खतरामा रहन सक्छ । 

११.भूकम्प आगलागी जस्ता अप्रत्यासित प्राकृतिक प्रकोपका बेला आपतकालीन उद्धारका लागि दोहोरो एम्बुलेन्स, दमकल चल्न सक्ने बाटोको चौडाई भएको बाटो रोज्ने । 

१२.प्लटिङका आकर्षित घडेरीहरू भन्ने विज्ञापन प्राय: देखिन्छन् । काठमाडौं उपत्यका विकास प्राधिकरणबाट स्वीकृति लिएर प्लटिङ गरेको हो भने मात्र घडेरी खरिद गर्नुपर्नेछ अन्यथा समस्या पर्नसक्छ । 

घर बनाउँदै हुनुहुन्छ वा सधियारको घर बन्दैछ ? 

१ तपाईं घर बनाउँदै हुनुहुन्छ भने नक्सा पास गरर स्वीकृत उँचाई अनुरुपमा मात्र बनाउनु होला । मापदण्ड मिचेर बनाइएका घर टहरा भत्काइनेछन । 

२.ख्याल गर्नुहोस् यदि स्वीकृत मापदण्ड मिचेर छिमेकीले घर बनाउन लागेमा त्यसकाे मारमा तपाईंसमेत पर्नुहुनेछ । भूकम्प वा अन्य कारणले छिमेकीको घर भत्किँदा आगलागी हुाँदा तपाईं पनि जोखिममा पर्न सक्नुहुन्छ । घाम, हावा छेकिएर तपाईं पनि अस्वस्थ हुन सक्नुहुन्छ । छिमेकीको पापको भागिदार तपाईं पनि हुन सक्नुहुनेछ ।