मङ्सिर २२, काठमाडौँ | हिमपहिरोमा बेपत्ता कीर्तिमानी आरोही तेन्जेन शेर्पाको खोजी तथा उद्धार अर्को वर्ष मात्रै हुने भएको छ।शेर्पा दुई महिनाअघि हिमाल चढ्ने क्रममा गत अक्टोबर ७ मा बेपत्ता भएका थिए।  

यस वर्ष हिमाल आरोहण तथा खोजी उद्धारको लागि सिजन सकिएको हुँदा बेपत्ता तेन्जेन लगायतको खोजी अर्को वर्ष गरिने उनी आबद्ध कम्पनी सेभेन समिटका महाप्रबन्धक थानेश्वर गुरागाईंले बताए।

‘यो वर्षको लागि सिजन सकियोे, अब अर्को वर्ष खोजीकार्य सुरु गर्छौं’, महाप्रबन्धक गुरागाइँले भने, ‘आगामी मार्च, अप्रिलमा उनलाई खोज्न आठ जना शेर्पाहरु सिसापाङ्मा हिमाल पठाउँछौं।’

विश्वका आठ हजार मिटरमाथिका १४ हिमाल सबैभन्दा कम समयमा आरोहण गरी गत २७ जुलाईमा विश्व कीर्तिमान कायम गरेका आरोही तेन्जेन शेर्पा हिमपहिरोमा हराइरहेका छन्। उनी तिब्बतस्थित १४ औं हिमाल सिसापाङ्माको आरोहण गर्ने क्रममा हिमपहिरोमा परेर बेपत्ता भएका थिए।

दुर्घटना भएको थाहा पाए लगत्तै कम्पनीले आफ्नो  पहलबाट गर्न सक्ने सबै प्रयास गर्दा पनि तेन्जेनलाई फेला पार्न नसकिएको गुरागाईंले बताए। उनले यस वर्ष कम्पनीका मान्छेहरू आफैंले प्रबन्ध गरेर खोज्ने परिस्थिति नभएको पनि बताए। उनले भने, ‘पटक पटकको पहलमा पनि चिनियाँ सरकारले हामी आफैं गएर उनको खोजी गर्न अनुमति दिएन।’ 

तत्कालीन समयमा त्यहीं भएका आरोहीहरूबाट सहयोग पाएको बताउँदै उनले थपे, ‘त्यहीं भएका अन्य आरोही साथीहरूले तेन्जेन तथा हिम पहिरोमा परेका अन्यहरूको खोजी गर्न सहयोग गरेका थिए, हामीले पनि आफ्नो तहबाट यथासंभव सहयोग गरिदिन उनीहरूलाई आग्रह गरेका थियौं।’

गुरागाईंका अनुसार सरकारले तेन्जेनको खोजी कार्यको लागि कम्पनीलाई संभाव्य सहयोग गरेको बताए। सरकारले सम्बन्धित निकायमा खोजी उद्धारको लागि कुरा गरिदिएको जनाउँदै उनले सरकारी सहयोगका बाबजुत पनि चीनले कम्पनीलाई तेन्जेनको खोजी गर्न जाने अनुमति नदिएको बताए। 

सेभेन समिट ट्रेकबाट आरोहण गरेका उनीहरूले १४ वटा हिमालको आरोहण तीन महिना दुई दिन अर्थात् ९२ दिनमा पूरा गरी कीर्तिमान कायम गरेका थिए। विश्व कीर्तिमान कायम गरेको ७२ दिनमै हिमपहिरोमा परेका उनी गत ७ अक्टोबरदेखि वेपत्ता भएका थिए। उनलाई ८ अक्टोबरमा चीन सरकारले मृत्यु भएको भनी घोषणा गरेको थियो। ७ अक्टोबरदेखि हिमपहिरोमा परी बेपत्ता भएका उनको अवस्था अहिलेसम्म पत्तो लाग्न सकेको छैन।