फागुन ५, इस्लामाबाद । पाकिस्तानमा दैनिक उपभोग्य खाद्यान्नहरुको मूल्यवृद्धि चुलिएको छ । बजारको ताजा मूल्यअनुसार पाकिस्तानमा एक किलो चियाको मूल्य १७ सय रुपैयाँ पुगेको छ भने पिठोको मूल्य १२५० रुपैयाँ किलो पुगेको छ ।

चिया, दाल, पिठो, चामल, तेललगायत खाद्यान्नको मूल्य उच्च रुपमा बढेसँगै उपभोक्ताको भान्सा पनि महँगो भएको छ । पाकिस्तानको कराची सहरको मध्यभागमा रहेको महारानी बजारमा किराना पसल चलाइरहेका जाहिदका अनुसार पछिल्लो ६ महिनाको अवधिमा १० किलो पिठोको मूल्य ४५० रुपैयाँले बढेको छ । ‘पहिला १० किलो पिठोको मूल्य आठ सय रुपैयाँ पर्थ्यो । अहिले भने १२ सय ५० रुपैयाँ पुगेको छ,’ बीबीसीसँगको कुराकानीमा जाहिदले भनेका छन्, ‘यस्तै खाने तेलको मूल्य पहिला ३८० रुपैयाँ लिटर पर्थ्यो भने अहिले ६२० रुपैयाँ पुगेको छ ।’

पहिला २८० रुपैयाँ किलोमा पाइने चनाको दालको मूल्य पाकिस्तानमा अहिले ४३० रुपैयाँ पुगेको छ । यस्तै मासको दाल पहिला प्रतिकिलो ३२० रुपैयाँमा पाइन्थ्यो भने अहिले चार सय रुपैयाँभन्दा माथि पुगेको छ । चियापत्तीको मूल्य पनि पहिला १४ सय रुपैयाँ मात्र पर्थ्यो अहिले बढेर १७ सय रुपैयाँ पुगेको छ ।

तस्बिर : आमिर कुरेसी