असोज १७, काठमाडौँ | आजकाल वर्क कल्चर निकै फेरिसकेको छ । यस्तोमा अफिसमा यस्ता विभिन्न प्रतियोगिता हुन्छन् जसले कर्मचारीका लागि काम गर्ने माहौल राम्रो बनाउँछ । कर्मचारीका लागि खेलकुद, क्रियाकलाप, गीत सङ्गीतको पनि व्यवस्था मिलाइन्छ । कर्मचारीलाई प्रेरित गर्न यसमा विभिन्न खालका इनाम पनि राखिन्छन् जुन पाउनका लागि मानिसले सक्दो प्रयास पनि गर्छन् । 

छिमेकी देश चीनमा पनि यस्तै घटना भएको छ । साउथ चाइना मर्निङ पोस्टका अनुसार चीनको गुआङ्डङ प्रान्तमा अवस्थित शेनजेन सहरमा एक कर्मचारीले अफिसको प्रतियोगिता जित्न आफ्नो ज्यानको बाजी नै लगाए । सुन्दा अचम्म लाग्ला प्रतियोगिता रक्सी पिउने थियो । जसले छिटो रक्सी पिउन सक्थ्यो, उसैले बाजी मार्थ्यो । 

छिटो रक्सी पिउने प्रतियोगिता

रिपोर्टका अनुसार यो घटना जुलाईको हो । एउटा कम्पनीले कर्मचारीका लागि एक डिनर कार्यक्रम आयोजना गरेको थियो । यसमा कम्पनीका बोसले रक्सी पिउने प्रतियोगिता राखे जसमा जित्नेले २० हजार युआन अर्थात् २ लाख ५९ हजार रुपैयाँ पाउँथे । 

जाङ थर भएका कर्मचारीले सबैभन्दा धेरै रक्सी पिएका थिए । याङ थर भएका बोसले पुनः अर्को प्रस्ताव राखे । जाङभन्दा बढी पिउनेलाई ५००० युआन थप दिने घोषणा बोसले गरिदिए । सुरुमा उनको प्रस्तावमा कसैले रुचि देखाएनन् तर बोसले १०,००० युआन थपिदिए पछि अरू कर्मचारी पनि ताते । साथै, जाङलाई कसैले हराउन सकेनन् भने उनले २ लाख ५९ हजार रुपैयाँ पाउने र उनले हारे भने एक लाख बढीको ट्रिट दिनुपर्ने सर्त पनि राखियो । 

कर्मचारीको पिउँदा पिउँदै मृत्यु भयो

त्यसपछि बोस आफैँले जाङसँग प्रतिस्पर्धाका लागि केही मानिस छाने । एक प्रतियोगीका अनुसार जाङले १० मिनेट भित्रै एक लिटर रक्सी पिए । पिउँदा पिउँदै  उनी ढले । उनलाई तत्काल अस्पताल लगियो । त्यहाँ डाक्टरले उनलाई अल्कोहल पोइजनिङ भएको बताए । उनलाई अचानक निमोनिया, हृदयाघात र सफोकेसनको समस्या देखियो । उपचार सुरु गरियो तर ३ अगस्टमा उनको निधन भयो । 

रमाइलो गर्ने उद्देश्यले सुरु गरिएको प्रतियोगिताले कर्मचारीको ज्यान नै लिएपछि कम्पनी बन्द भयो । प्रहरीले उक्त घटनाको अनुसन्धान गरिरहेको छ ।