असोज ३, काठमाडौँ | चीनको एउटा वीर्य बैंकले चिनियाँ विद्यार्थीमाझ ‘वीर्य दौड’ प्रतियोगिताको घोषणा गरेको छ। प्रतियोगितामा विजेता हुनेले ६ हजार १ सय युआन (६ सय ७१ पाउन्ड) रकम पाउने बताइएको छ। विजेता हुन केके मापदण्ड र कस्ता कुरा अध्ययन गरिनेछ भन्नेबारे आयोजकले विस्तारपूर्वक बताएको छ।

ह्युमन स्पर्म बैंक झेंझाउले विच्याट सामाजिक सञ्जालमार्फत गत साता यस्तो घोषणा गरेको हो। ५० दिनभित्र इच्छुकले यसमा सहभागिता जनाउन सक्ने बताइएको छ। विद्यार्थीहरूको वीर्यको गुणस्तर जाँच गर्न, तिनलाई आफ्नो वीर्य भविष्यसम्म सुरक्षित राख्न यो अभियान चलाइएको स्पर्म बैंकले जनाएको छ।

उसो भए वीर्यमा के कुराको ख्याल राखिन्छ त? बेलायती अखबार द डेली टेलिग्राफका अनुसार, वीर्यमा बाक्लोपना, वीर्यको तीव्र गति, वीर्यको सुन्दर संरचना आदि कुराको ख्याल राखिनेछ।

पछिल्लो समय चीनमा पुरुषहरूको वीर्यको गुणस्तर खस्किँदै गएको एउटा अध्ययनले देखाएको छ। उमेर बढ्दै जाँदा वीर्यको गुणस्तर अझ बढी खस्किने हुँदा समयमा नै तिनलाई सुरक्षित राख्न वीर्य बैंकहरूले सर्वसाधारणलाई प्रेरित गर्ने गरेका छन्।

चीनमा भने पुरुषहरूमा बढ्दो तनाव तथा वातावरणीय प्रदूषणका कारण वीर्यको गुणस्तर घट्न थालेको विभिन्न अध्ययनले देखाएका छन्।

चीनमा सन् २०२२ मा जन्मदर १.०९ प्रतिशत थियो। जन्मदर बढाउन चिनियाँ सरकारले विभिन्न कार्यक्रम घोषणा गरेको छ। खासगरी बालबालिका हेरचाह। जन्मदर बढाउन आवश्यक नीति तथा बढी बालबालिका जन्माउने पति/पत्नीलाई विशेष सुविधाजस्ता कार्यक्रमहरूमा पछिल्लो समय चिनियाँ सरकारले जोड दिइरहेको छ।

बैंकमा वीर्य जम्मा गराउने सुविधा सरकारले विवाहितहरूलाई मात्र दिएको छ। तर युवाहरूलाई यस प्रतियोगितामा सामेल गराएर झेंझोउ प्रान्तले भने सरकारसँग नयाँ खतरा मोलेको छ।

चीनभरिका वीर्य बैंकले पछिल्लो समय वीर्यदाताहरूको अभाव खेपिरहेका छन्। एक त यस्तो गर्नु चिनियाँ समाजले उति राम्रो मान्दैन, दोस्रोचाहिँ उपयुक्त पात्र तथा दाताहरू फेला परिरहेका छैनन्। यस्तोमा वीर्यदानलाई बहसमा ल्याउन ढिला भएकाले यस्तो प्रतियोगिता गराएको बैंकको हवाला दिँदै सिन्ह्वा समाचार एजेन्सीले जनाएको छ।