साउन १२, काठमाडौँ | भारतीय क्रिकेट कन्ट्रोल बोर्ड (बीसीसीआई) का सचिव जय शाहले आगामी एकदिवसीय विश्वकपको खेल तालिकामा केही परिवर्तन गरिने बताएका छन् । आईसीसी एकदिवसीय विश्वकप आगामी अक्टोबर ५ देखि नोभेम्बर १९ तारिखसम्म भारतमा आयोजना हुँदैछ । 

अन्तर्राष्ट्रिय क्रिकेट काउन्सिल (आईसीसी) का तीनवटा पूणर्कालीन सदस्यले लिखित रुपमै आग्रह गरेपछि विश्वकपको खेल तालिकामा सामान्य परिवर्तन गरिने शाहले बताए । उनले विश्वकपको खेल तालिकामा परिवर्तनको माग गर्ने राष्ट्रको नाम भने बताएनन् । 

बीसीसीआईले यस विषयमा आईसीसीसँग छलफल गर्ने भएको छ । केही खेलको मिति र समयमा परिवर्तन भए पनि भेन्यू (खेल स्थल) मा कुनै परिवर्तन नहुने पनि शाहले जनाएका छन् । ‘अहिलेको खेल तालिका हेर्दा कतिपय टोलीको दुई खेलको बीचमा लामो समयको अन्तर देखिन्छ । सम्भवतः त्यसलाई कम गरिने छ,’ बीसीसीआईका सचिव शाहले भनेका छन् । 

बीसीसीआईले बिहीबार आगामी विश्वकपका खेल खेलाउने राज्यका क्रिकेट संघहरुसँग छलफल गरेको थियो । ‘विश्वकपमा सहभागी हुने तीनवटा राष्ट्रले खेल तालिका सामान्य परिमार्जन गरिनु पर्ने माग राखेका छन् । सोही अनुरुप केही खेलको मिति र समय परिवर्तन हुने सम्भावना छ,’ शाहले भने । 

यदि दुईवटा खेलको बीचमा ६ दिनको अन्तर छ भने त्यसलाई घटाएर चार वा पाँच दिनमा मmारिने जानकारी शाहले दिए । उनले आगामी तीन वा चार दिनभित्र यसको अन्तिम टुङ्गो लाग्ने पनि बताएका छन् । 

विश्वकममा अक्टोबर १५ तारिखमा हुने भनिएको दुई चिर प्रतिद्वन्द्वी भारत र पाकिस्तानबीचको खेलको मिति समेत परिवर्तन गरिनुपर्ने प्रस्ताव आएको बताइएको छ । भारत र पाकिस्तानबीचको खेल १५ तारिखमा अहमादाबादमा खेलाइने भएको छ । तर, त्यो दिन हिन्दुहरुको विशेष पर्व नवरात्री सुरु हुने भएकाले उक्त खेलको मिति परिवर्तन गर्दा उचित हुने प्रस्ताव गरिएको हो । 

नवरात्रीको सुरु हुने दिन अहमादावादमा ठूलो उत्सव हुने भएकाले सुरक्षा ब्यवस्थालाई ध्यानमा राखी उक्त खेलको मिति परिवर्तन गरिनुपर्ने सुझाव प्राप्त भएको समाचारमा जनाइएको छ । स्थानीय सुरक्षा अधिकारीहरु पनि उक्त खेलको मिति परिवर्तन गरिनुपर्ने पक्षमा देखिएका छन् । 

त्यसैले भारत र पाकिस्तानबीचको खेल एक दिन पहिले अक्टोबर १४ तारिखमै खेलाइने गरी छलफल अगाडि बढाइएको छ । तर, अहिलेको खेल तालिका अनुसार, १४ तारिखमा तीनवटा खेल राखिएको छ । १४ तारिखमा बंगलादेश र न्युजिल्यान्ड तथा अफगानिस्तान र इङ्ल्यान्डबीच खेल हुनेछ । त्यसअघि १३ तारिखमा खेलाइने अस्ट्रेलिया र दक्षिण अफ्रिकाबीचको खेल पनि दिवा—रात्री छ । 

यस विषयमा पनि सचिव शाहसँग सञ्चारकर्मीले प्रश्न सोधेका थिए । त्यसको जवाफमा शाहले भनेका छन्, ‘तीनवटा सदस्य राष्ट्रले मात्र मिति र समय परिवर्तनका लागि आईसीसीसँग लिखित आग्रह गरेको छन् । त्यस्तो अरु कुनै प्रस्ताव प्राप्त भएको छैन । भारत र पाकिस्तानबीचको खेलमा पनि कुनै सुरक्षा चुनौति छैन ।’

गत महिना आईसीसी र बीसीसीआईले संयुक्त रुपमा आगामी एकदिवसीय विश्वकपको खेल तालिका सार्वजनिक गरेका थिए । आगामी विश्वकपको उद्घाटन खेल अक्टोबर ५ तारिखमा अहमादाबादमा इङ्ल्यान्ड र न्युजिल्यान्डबीच खेलिने छ । विश्वकप अवधिभरमा भारतका १० वटा रंगशालामा कूल ४८ खेल खेलिने छ ।