सन्तोषकुमार गुप्ता/ माघ १७, भालुवाङ ।  शहिद दिवसको अवसरमा शनिबार सामुदायिक प्रहरी सेवा केन्द्र लालमटियाले लालमटियाको धार्मिक तथा पर्यटकीयस्थल हर्षेडाँडा मन्दिर परिसर सरसफाई गरेको छ ।

लालमटिया गाविसलाई पूर्ण सरसफाई गाविस बनाउन तथा नागरिकहरुमा धार्मिक, समाजिक तथा सार्वजनिक स्थलको संरक्षण सर्बद्धन गर्न सरसफाई गर्नु पर्छ भन्ने सन्देश प्रबाह गर्ने उद्देश्यले सेवा केन्द्रको बार्षिक नियमित तथा मासिक कार्यक्रम अन्र्तगत यस पटक धार्मिक स्थल सरसफाई गरिएको केन्द्रले जनाएको छ । सार्वजनिकस्थलको सरसफाई स्वम् आफैले गर्नु पर्छ भन्ने बानीको विकास गराई सरसफाई कार्यलाई निरन्तरता दिन केन्द्रले यसरी नै महिनाको दुई पटक सार्वजनिक स्थलको सरसफाई गर्ने केन्द्रकी केन्द्रकी अध्यक्ष हिमाली न्यौपानेले जानकारी दिईन् । अरुलाई सरसफाई गर्नु भन्दा पनि आफैले सरसफाई गरेर देखाए पछि मात्र उनीहरुले पनि सरसफाई गर्नु पर्छ भन्ने भावनाको विकास हुन्छ त्यसैले हामीले पनि यसरी सरसफाई गरेका हौँ अध्यक्ष न्यौपाने भनिन् । सहिदहरुलाई सम्झने फरक—फरक तरिका हुन्छ, हामीले सहिदको सम्झनामा धार्मिकस्थल सरसफाई ग¥यौँ अध्यक्ष न्यौपानेले भनिन् । वि.सं. १९९७ साल माघ १६ गते तत्कालिन निरकुश राणशाहीले प्रजातन्त्रका खातिर आवाज बुलन्द गर्ने चार होनहार व्यक्तिहरु दशरथ चन्द, धर्मभक्त माथेमा, गंगालाल श्रेष्ठ र शुक्रराज शास्त्रीलाई मृत्यु दण्ड दिएको थियो, सोही दिनको सझनामा प्रत्येक बर्ष माघ १६ गते शहिद दिवस मनाउँदै आएको छ । उक्त धार्मिक तथा पर्यटकीयस्थल हर्षेडाँडामा प्रत्येक बर्ष पु २९ गते देखि माघ २ गते सम्म माघी मेला सञ्चालन हुँदै आएको छ । साथै हर्षेडाँडामा देउखुरी लगायत विभिन्न ठाउँबाट बनभोज खान विभिन्न समूह र घुम्नका लागि युवा युवती, प्रेम जोडी तथा नवदम्पति जोडी समेत आउने गर्दछन् । सरसफाई कार्यक्रममा ईलाका प्रहरी कार्यालय भालुवाङ्गका प्रहरी सहायक निरिक्षक रोहित कुँवरक्षेत्री, अस्थाई ट्राफिक प्रहरी पोष्ट भालुवाङ्गका ट्राफिक प्रहरी प्रमुख चन्द्र केसी, सेवा केन्द्रका उपाध्यक्ष सन्तोषकुमार गुप्ता, सचिव उमेश अधिकारी, कोषाध्यक्ष युवराज भुसाल, सदस्यहरु मालिका आचार्य, शारदा भुसाल, शान्ति विक, सरस्वती पोख्रेल, कमला गिरी, केन्द्रका कार्यालय प्रमुख तथा सामुदायिक प्रहरी अमृत कठायत, सञ्चारकर्मी विदुर एमसी, इराधा झाँक्री लगायतको उपस्थति रहेको थियो ।