सन्तोषकुमार गुप्ता/पुस ७, दाङ । दाङमा रहेका बास्केट बल खेलाडीहरुको भेलाले आइतबार दाङ जिल्ला बास्केट बल संघ गठन गरेको छ ।

ज्ञानसिंह बुढामगरको अध्यक्षता एवं जिल्ला खेलकुद विकास समितिका अध्यक्ष डिल्लीबहादुर डाँगीको प्रमुख आतिथ्यता तथा कोषाध्यक्ष कैलाश रोकामगरको विशिष्ट आतिथ्यतामा भएको भेलाले ज्ञानसिंह बुढामगरको अध्यक्षतामा नौ सदस्यीय जिल्ला कार्यसमिति गठन गरेको छ ।

जसको उपाध्यक्षमा विपिन केसी, सचिवमा दिपक रोकामगर, कोषाध्यक्षमा प्रज्ज्वल शाह र सहसचिवमा सुदेशराज श्रेष्ठ रहनुभएको छ । त्यसैगरी संघका सदस्यहरुमा केशव रोका, गिरी पुन, सन्देश श्रेष्ठ र विक्रम बुढामगर रहनुभएको छ ।

संघको कार्यसमितिमा २ जना महिला खेलाडीलाई मनोनित गरिने छ । विपिन केसीको स्वागत मन्तव्यबाट सुरु भएको कार्यक्रममा दाङ जिल्ला खेलकुद विकास समितिका कार्यालय प्रमुख शान्ति शोमेई थापा, समाजसेवी कुलप्रसाद बुढामगर, मणिश डिसी, गिरी पुन, विशाल रोकामगर, पंकज बुढामगरलगायतले बास्केट बललाई व्यवस्थित बनाउँदै लैजानुपर्ने बताउनुभएको थियो । कार्यक्रमको सहजीकरण आशिष पाण्डेले गर्नुभएको थियो ।