सन्तोषकुमार गुप्ता/ मंसिर २९, देउखुरी । १६ करोड ४० लाखको लागतमा लमही साना सहरी खानेपानी तथा सरसफाई आयोजनाको निर्माण सम्पन्न भएको छ । खानेपानी तथा ढल निकास विभाग, दोस्रो साना सहरी खानेपानी तथा सरसफाई आयोजना अन्र्तगत सम्पन्न भएको साना सहरी खानेपानी आयोजनाको उद्घाटन गरिएको हो । लमही खानेपानी उपभोक्ता तथा सरसफाई संस्थाले सञ्चालनमा ल्याएको आयोजनाको सोमबार उद्घाटन आयोजना ब्यवस्थापन कार्यालयका आयोजना निर्देशक तिरेसप्रसाद खत्रीले गर्नुभयो ।

२०६८ फागुन १० गतेवाट आयोजनाको निर्माण कार्य सुरु भएको थियो । आयोजनाको निर्माण कार्य सुरु भएको दुई वर्ष २०७० पुस १६ गते सम्पन्न गर्ने लक्ष्य राखीएको थियो । तर, तत्कालीन समयमा भएका वन्द हड्तालका कारण आयोजनाको निर्माण कार्यको समय लम्वीएको थियो । आयोजनाको निर्माण कार्य २०७२ बैशाख ४ गते सम्पन्न भएको निर्माण कम्पनी सिचुवान चन्द्रा एण्ड वसन्त नागार्जुन जेभीका ईञ्जिनियर तपराज पाठकले जानकारी दिनुभयो । आयोजना सम्पन्न गर्न १६ करोड ४० लाख ४० हजार २८ रुपैयाँ ६४ पैसा खर्च भएको छ । जसमा उपभोक्ताको ८२ लाख २ हजार १ रुपैयाँ ४३ पैसा लगानी लागेको छ । नगर विकास कोषले ७ करोड ३८ लाख १८ हजार १२ रुपैयाँ ८९ पैसा ऋण सहयोग गरेको छ । नेपाल सरकारको ८ करोड २० लाख २० हजार १४ रुपैयाँ ३२ पैसा सहयोग गरेको छ । उपभोक्ताको ५ प्रतिशत, नगरविकास कोषको ४५ प्रतिशत ऋण र नेपाल सरकारको ५० प्रतिशत अनुदानमा आयोजना सम्पन्न भएको हो । २० वर्ष सम्म वृद्धि हुने जनसंख्यालाई धान्ने गरी आयोजनाको संरचना तयार पारिएको छ । खानेपानीको श्रोत जमिन मुनीको पानी हो । लमही नगरपालीका वडा नं. १० देउपुरमा वोरिङ्ग गाडिएको छ । जमिन मुनीको पानी उपभोक्तालाई वितरण गर्दै आएको छ । ४(लाख लिटर पानी अटाउने क्षमताका २ वटा जमिन मुनीको पानी टंकी, १ लाख ५० हजार लिटर पानी अटाउने ओभरहेड टंकी निर्माण गरिएको छ । पुरानो १ लाख ५० हजार लिटर पानी हटाउने टंकी सहीत जम्मा ११ लाख लिटर पानी अटाउने टंकीवाट पानी वितरण भैरहेको खानेपानी संस्थाले जनाएको छ । दुई हजार २ सय ५१ उपभोक्ताले धारा जडान गरेको छन् । लमही नगरपालीकाको वडा नं. ६ को वनगाउँ, वडा नं. ८ को अर्नहवा, चैलाही, शान्तिनगर, वडा नं. ९ को मध्यनगर, लङ्गडी, खैरी, वडा नं. १० को देउपुर, प्रगतीनगर, वड्की र छोड्की मोहरा र वडा नं. ११ को लमही बजारमा खानेपानी संस्थाले पानी वितरण गरीरहेको छ । खानेपानी संस्थाले वोत्तलको पानी विक्रि गर्ने लमही खानेपानी उपभोक्ता तथा सरसफाई संस्थाले वोत्तलमा पानी विक्रि गर्ने योजना अघि सारेको छ ।‘वोत्तल वन्द पानी’ वितरणको प्रकृया अन्तिम चरणमा पुगेको संस्थाका सचिव तिलक न्यौपानेले प्रस्तुत गर्नु भएको प्रगती प्रतिवेदनमा जनाइएको छ । सहुलीयत दरमा वोत्तलमा पानी प्याक गरी पानी वितरणको लागी मेसीन जडानको काम वाँकी रहेको जनाइएको छ ।