सन्तोषकुमार गुप्ता/मङ्सिर २९, दाङ । नेपाल पत्रकार महासंघ दाङ शाखाद्वारा गठित प्रतिभा छनौट समितिले आफ्नो २३ औँ स्थापना दिवसको अवसरमा पुरस्कृत तथा सम्मान गर्नका लागि पत्रकारहरुको नाम महासंघलाई सिफारिस गरेको छ ।

प्रतिभा छनौट समितिको सोमबार घोराहीमा बसेको बैठकले चार जना पत्रकारलाई पुरस्कृत गर्न, दुई जना पत्रकारका साथै महासंघमा पुरस्कार अक्षयकोष स्थापना गर्ने सबै संस्थापकहरुलाई सम्मान गर्न सिफारिस गरेको हो ।

महासंघका अध्यक्ष तथा प्रतिभा छनौट समितिका संयोजक सुदीप गौतमको अध्यक्षता एवम् महासंघका केन्द्रीय सदस्य अजयदीप शर्माको प्रमुख आतिथ्यमा बसेको बैठकले अविराम पत्रकारिता पुरस्कार अग्रज पत्रकार सुशील गौतमलाई, वर्ष उत्कृष्ट पत्रकारिता पुरस्कार पत्रकार दशरथ घिमिरेलाई, महिला सिर्जनशील पत्रकारिता पुरस्कार सपना बोहरालाई र विशेष प्रोत्साहन पत्रकारिता पुरस्कार पत्रकार निशानदाजु भट्टराईलाई प्रदान गर्न महासंघलाई सिफारिस गरेको समितिका संयोजक सुदीप गौतमले जानकारी दिनुभयो ।

गौतमका अनुसार बैठकले अग्रज पत्रकार रामप्रसाद पौडेल र निमबहादुर थापाका साथै नेपाल पत्रकार महासंघ दाङ शाखामा पुरस्कार अक्षयकोष स्थापना गर्ने पुरस्कार संस्थापकहरुलाई पनि सम्मान गर्न सिफारिस गरेको छ ।

महासंघमा हालसम्म १२ वटा पुरस्कार अक्षयकोषहरु रहेका छन् । त्यसमध्ये महासंघ दाङ शाखाको पुरस्कार अक्षयकोष बाहेक अन्य पुरस्कार संस्थापकहरुमा नारायणप्रसाद शर्मा, टीकाराम रेग्मी, खगराज लोहनी, सुदर्शन रिजाल, राधा रिजाल, दामोदर सुवेदी, सर्वजीत ओली, शिवहरि मरहट्ठा, रामप्रसाद जैशी, नारदमणि पोख्रेल, उत्तमकुमार श्रेष्ठ, नारायणी रजौरे र मनोज बुढाथोकी रहनुभएको छ ।

पुरस्कार तथा सम्मान महासंघको २३ औं स्थापना दिवस तथा साधारणसभाको अवसरमा यही पुस ४ गते घोराहीमा विशेष समारोहका बीच प्रदान गरिने महासंघका अध्यक्ष सुदीप गौतमले जानकारी दिनुभयो ।