सन्तोषकुमार गुप्ता/मङ्सिर २९, दाङ । स्वयंसेवी रक्तदाता समाजको आयोजनामा आज सोमवार घोराहीमा रक्तदान कार्यक्रम सम्पन्न गरिएको छ ।

नेपाल स्वंसेवी रक्तदाता समाजका केन्द्रीय अध्यक्ष प्रेमसागर कर्माचार्यले १४४ औं पटक रक्तदान गर्नुभएको छ । नेपालका सबैभन्दा रक्तदान गर्ने व्यक्ति रहनुभएका समाजसेवी कर्माचार्य काठमाण्डौं बागबजार निवासी हुनुहुन्छ ।

तत्कालिन समयमा १६ वर्षको उमेरदेखी रक्तदान गर्न शुरु गर्नुभएका उहाँले हालसम्म स्वास्थ्यले साथ दिइरहेका कारण रक्तदानलाई निरन्तरता दिँदै आएको बताउनुभयो । ‘हाल म ५० वर्षको भए ।

त्यतिबेला १८ वर्ष हुनुपर्ने उमेरको हद थिएन । स्वस्थ भएका कारण मैले १६ वर्षकै उमेरमा रक्तदान शुरु गरेको हुँ, अध्यक्ष कर्माचार्यले भन्नुभयो, हालसम्म पनि स्वास्थ्यले साथ दिएका कारण रक्तदान गरिरहेको छु । हाम्रो शरिरमा रहेर पनि यत्तिकै खेर गइरहेको रगत अरु कसैका निमित्त जीवनदान हुन सक्छ भने किन रक्तदान नगर्ने ?’

नेपाल स्वयंसेवी रक्तदाता समाज दाङका अध्यक्ष जीतबहादुर केसीको अध्यक्षता तथा समाजका केन्द्रीय अध्यक्ष प्रेमसागर कर्माचार्यको प्रमुख आतिथ्यमा भएको कार्यक्रममा कर्माचार्यसहित ९ जनाले रक्तदान गर्नुभएको थियो ।

यसरी रक्तदान गर्नेहरुमा प्रेमसागर कर्माचार्य, रोशनमान श्रेष्ठ, राजीव शिल्पाकार, देविका घर्तीमगर, शरद अधिकारी, कृष्णकुमार चौधरी, रुद्रबहादुर डाँगी, यमलाल घिमिरे, लक्ष्मी अधिकारी रहनुभएको छ ।

कार्यक्रममा समाजका जिल्ला अध्यक्ष केसीले जिल्लामा पछिल्लो समय रगतको अभाव रहेको समयमा रगतको अभावलाई नियमित रुपमा कम गर्न रक्तदान गर्नुपर्छ भनेर जनचेतना अभिवृद्धि गर्नका निमित्त केन्द्रीय अध्यक्षलाई आमन्त्रण गरि रक्तदान कार्यक्रमको आयोजना गरिएको जानकारी दिनुभयो ।

त्यस अवसरमा नेपाल रेडक्रस सोशाइटी रक्तसञ्चार केन्द्र दाङका इञ्चार्ज दिलिप न्यौपानले दाङमा प्रतिमहिना १ सय ५० देखी २ सय प्वाइन्ट रगत आवश्यक रहेको बताउँदै पछिल्ला केही समय रगतको अभाव केही रुपमा कम हुँदै गएको जानकारी दिनुभयो । कार्यक्रमको सहजिकरण नेपाल स्वयंसेवी रक्तदाता समाज दाङका सचिव थमन चौधरीले गर्नुभएको थियो ।