फागुन २७, कालिकोट । शैक्षिक सत्रको सुरुवातमा कालीकोटका विद्यार्थीहरुले यो बर्ष पनि पाठ्यपुस्तक नपाउने भएका छन् । जिल्लाका अधिकांश स्थानीय तहहरुले समयमै पाठ्यपुस्तक खरिदका लागि बजेट निकासा नगरे पछि विद्यार्थीका हातमा  समयमै पाठ्यपुस्तक पुर्याउने नसकिने भएको हो ।

जिल्लाको सदरमुकाम समेत रहेको खाँडाचक्र नगरपालिकाले हालसम्म कुनै पनि विद्यालयमा पाठ्यपुस्तक खरिदका लागि निकासा नदिएको श्रोत व्यक्ति ठाकुर ज्ञवालीले बताए । ‘फागुनको पहिलो साताभित्र विद्यालयको खातामा पाठ्यपुस्तकको बजेट निकासा भएपछि नयाँ शैक्षिक सत्र सुरुवातीमा विद्यार्थीलाई पाठ्यपुस्तक उपलब्ध गराउन सकिन्छ’ उनले भने, ‘हालसम्म पनि नगरपालिकाले पाठ्यपुस्तक र शिक्षकहरुको तेस्रो चौमासिकको तलव समेत निकासा गरेको छैन ।’

विद्यालय श्रोत व्यक्ति ज्ञवालीका अनुसार जिल्लाका अन्य स्थानीय तहका विद्यालयमा कार्यरत शिक्षकहरुले यही फागुन पहिलो साता तलव खाईसके तर खाँडाचक्र नगरपालिकाको हालसम्म कुनै पनि विद्यालयका शिक्षकहरुको तलव निकासा गरेको छैन् । खाँडाचक्र नगर प्रमूख जसीप्रसाद पाण्डेले दुई हप्तादेखी लेखापाल बिदामा बसेपछि नगरपालिकाका कामहरु प्रभावित भएको बताए ।

उनले नगरपालिकामा लेखापाल आएपछि पाठ्यपुस्तक, शिक्षकहरुको तलव निकासा गरिने बताए । यस्तै जिल्लाको कालिका गाउँपालिका अध्यक्ष खडानन्द चौलागाईले आफुहरुले सिधै पुस्तक सप्लायर्सहरुलाई पाठ्यपुस्तक खरिदका लागि पहल गरिसकेको बताए । ‘विद्यालयको खातामा रकम निकासा नगरी आवश्यक पर्ने पुस्तकको विवरण अनुसार पुस्तक सप्लायर्सलाई खबर गरेका छौ’ उनले भने, ‘किताब आएपछि उनीहरुकै खातामा रकम भुक्तानी गरिनेछ ।’

उनले आफुहरुले चैत मसान्तसम्म सबै विद्यालयमा आवश्यक पाठ्पुस्तक पुर्याउने लक्ष्य रहेको बताए । जिल्लाका अन्य स्थानीय तहले पनि पाठ्यपुस्तक खरिदका लागि ढिलासुस्ती गरेको विद्यालयको गुनासो छ ।