दलसिंह गिरी | पुस १०, कालिकोट । म्यादी प्रहरी हत्याको घटनाको छानविनका लागि कालिकोट आएका डिआईजी रमेश खरेल सहितको छानविन टोली जिल्ला सदरमुकाम मान्म पुगे संगै कालिकोटको जनजीवन सामान्य बनेको छ । शुक्रबारदेखि तनावग्रस्त रहेको जिल्ला सदरमुकाम मान्म छानविन टोली पुगे संगै आज सोमबार जनजीवन सामान्य बनेको हो ।

स्थानीय प्रशासनले ३ दिन देखि लगाएको कफर््यु सोमबारबाट हटाएको छ । प्रहरी प्रशासनले म्यादीप्रहरीलाई दिइने सेवासुविधाको केही रकम कटौती गरी कम दिएको भन्दै धर्नामा बसेका म्यादी प्रहरीलाई गएको शुक्रबार प्रहरीले नियन्त्रणमा लिन खोज्दा दोहोरो झडप भै प्रहरीले गोली चलाउदा म्यादी प्रहरी विवेक ऐडीको ज्याएपछि आन्दोलनले उग्ररुप लिएको थियो । म्यादी प्रहरीको आन्दोलन नियन्त्रण भन्दा बाहिर गएपछि प्रशासनले ३ दिन देखि कफ्र्यू लगाएको थियो ।

प्रशासनले आज सोमबारबाट कफर्यू हटाएपछि बिहानैदेखि मान्मका पसलहरु खुलेका छन् भने बजारमा मानिसहरुको आवत जावत पनि बढेको छ । कर्णाली राजमार्गमा चल्ने सवारी साधनहरु आ–आफ्नो गन्तब्यमा गएका छन् ।

म्यादी प्रहरीको मृत्यु भएपछि सरकारले गृह मन्त्रालयका सह–सचिव मानबहादुर वि.क संयोजक, समितिका सदस्य नेपाल प्रहरीका डिआइजी रमेश खरेल, सशस्त्र प्रहरीका डिआइजी प्रविण श्रेष्ठ र राष्ट्रिय अनुसन्धानका लक्ष्मण गुरुङ सोमबार जिल्लामा पुगेका छन् । घटनाको छानविन गर्न आएको टोलीले जिल्लामा आए लगत्तै पीडित परिवार र नागरिक समाजका प्रतिनिधीसंग छलफल गरेको छ भने राजनीतिक दल र जनप्रतिनिधिसंग पनि छलफल गरेको छ ।

सरकारले यस अघि ऐडीको परिवारलाई १० लाख क्षतिपुर्ति दिने र घाइतेको निःशुल्क उपचार गराउने निर्णय गरिसकेको छ । ऐडीका परिवारले घटनाका दोषीलाई हदैसम्मको कारवाही र मृतकलाई सहिद घोषणाको माग गर्दै मृतकको शव नबुझ्ने भन्दै जिल्ला प्रशासन कार्यालय कालीकोटको गेटमा धर्ना दिइरहेका­ छन् ।