दलसिंह गिरी/कात्तिक १३, कालिकोट । राम्रा काम गर्न धेरै लेखपढ् गर्नु पर्दैन भन्ने कुरा कालिकोटको कालिका गाउँपालिका वडा–५ सुकाटियाका महिलाहरूले साबित गरिरहेका छन् । 

राम्रोसँग लेखपढ समेत गर्न नजान्ने महिलाहरूले मदिराका कारण समाज भाँडिन थालेपछि मदिरा नियन्त्रण अभियान चलाएका हुन् । स्थानीय आमा समूहले मदिरा नियन्त्रण अभियान थालेपछि बिहानैदेखि मदिरा सेवन गर्ने बानी परेका पुरुषहरू ठाउँमा आउन थालेका छन् । खुलेर मदिरा सेवन गरि हो हल्ला गरे महिलाहरूको कार्वाहीमा परिने डरले पुरुषहरूले लुकिछिपी बाहेक मदिरा सेवन गर्न कम गरेको स्थानीय रामबहादुर शाहीले बताए । 

‘गाउँमा मदिरा सेवन गरे महिलाबाट कारवाही परिने डर छ’ उनले भने, ‘मदिरा सेवन गरे कारवाहीमा परिने डरले कसै कसैले लुकिछिपी मदिरा सेवन गर्ने गरेका छन् ।’

महिलाहरूले गाउँमै उत्पादन हुने अबैध मदिरा नियन्त्रण गरि नष्ट पारेपछि मदिरा बेचेर पैसा कमाउनेहरू पनि पाखा लाग्न थालेको वडा अध्यक्ष किसनबहादुर शाहीले बताए । ‘गाउँमा महिलाहरूले स्थानीय रुपमा उत्पादन हुने मदिरा नियन्त्रण अभियान थालेपछि मदिराको जथाभावी कारोबार गर्नेहरू पनि ठेगान लागेका छन’ उनले भने, ‘त्यसका लागि वडापालिका, प्रहरीले साथ दिएका छन् ।’

महिलाहरूकै सक्रियतामा शनिबार मात्र गाउँघरमै उत्पादन भएको ७ सय ५० लिटर घरेलु मदिरा नियन्त्रणमा लिएर नष्ट गरिएको आमा समुहकी सदस्य मैयाकला शाहीले बताइन् । 

‘गाउँमा जताततै मदिरा पाइन थालेपछि समाजमा झै झगडा बढ्न थाल्यो’ उनले भनिन्, ‘विकृति बढ्दै गएपछि यसको नियन्त्रण अभियान थालेका छौं ।’ शाहीले मदिरा उत्पादन गर्ने र सेवन गर्ने जो कोहीलाई आमा समूहले छुट नदिने बताइन् ।

महिलाहरूले मदिरा नियन्त्रण अभियान थालेपछि गाउँ निकै शान्त रहन थालेको वडा अध्यक्ष शाहीले बताए । ‘पहिले गाउँमा मदिराका कारण झै–झगडा, होहल्ला निकै थियो’ उनले भने, ‘अहिले मदिरा नियन्त्रण गर्न महिलाहरू आफैले अभियान थालेपछि निकै शान्त छ ।’

आमा समुहका महिलाहरूले अहिले गाउँमा कसैले मदिरा उत्पादन गरेको खण्डमा, मदिरा खाएर होहल्ला गरेमा जरिवाना गर्ने, अटेर गरेमा प्रहरी बुझाउने अभियान थालिएको आमा समुहकी सदस्य नानसरा शाहीले   बताइन् । ‘कसैले घरेलु मदिरा उत्पादन गरेमा जरिवानाको समेत व्यवस्था गरेका छौं’ उनले भनिन्, ‘त्यसलाई अटेर गरेमा प्रहरीलाई समेत बुझाउने निर्णय गरिएको छ ।’