भदौ १६, सुर्खेत । एसईईको ग्रेड बृद्धि परीक्षाको तयारी गर्न दैलेखबाट फुपूको घरमा आएकी १५ वर्षीय किशोरीलाई होटेलमा बन्धक बनाएर बलात्कार गरेको आरोपमा एक युवकलाई प्रहरीले पक्राउ गरेको छ।

अछामको पञ्चदेवल विनायक नगरपालिका–३ घर भई वीरेन्द्रनगर वीरेन्द्रनथर-३ तातापानीमा अटो व्यवसाय गरिरहेका ३६ वर्षीय सुरेन्द्रबहादुर शाहीलाई बुधबार प्रहरीले पक्राउ गरेको हो।

एसईईको नतिजापछि दुई विषयको ग्रेड वृद्धिको लागि घरबाट वीरेन्द्रनगरर फुपूको घरमा आएकी उनलाई बाटोबाटै होटेलमा लिएर पटक-पटक बलात्कार गरेको प्रारम्भिक अनुसन्धानबाट खुलेको जिल्ला प्रहरी कार्यालय सुर्खेतका प्रहरी नायव उपरीक्षक एवं प्रवक्ता लक्ष्मणबहादुर शाहीले जानकारी दिए।

शाहीका अनुसार ती बालिका भदौ २ गते दैलेखबाट गाडी चढेर सुर्खेत आएकी थिइन्। उनी साँझपख मात्रै सुर्खेत पुगेको र अस्पतालको चोक नजिक फुपूको घर भन्ने सुनेकोले अटो चालक सुरेन्द्रबहादुरले त्यही मौकामा बलात्कारको योजना बनाएको अनुसन्धानमा खुलेको छ।

सुरेन्द्रले भे १ ह २३०९ नम्बरको अटो रिक्सामा वीरेन्द्रनगर-६ शनिहल लाइनमा रहेको ‘यरो थकामी बार एन्ड लज’ को ४०१ नम्बर कोठमा ल्याई पटक-पटक बलात्कार गरेको पीडित किशोरीले जाहेरीमा उल्लेख गरेकी छन्।

चालकले होटल सञ्चालकलाई समेत आफ्नी श्रीमती भन्दै झुक्याएर पछाडिबाट किशोरीलाई कोठामा पुर्याएको समेत प्रहरी अनुसन्धानमा देखिएको प्रवक्ता शाहीले बताए।

ती किशोरीलाई कोठामा लगेर आफू यो क्षेत्रको डन भएको भन्दै भनेको नमाने मारिदिन्छु भनेर बलात्कार गरेका थिए। सुरेन्द्रले आफू निस्केका बेला बाहिरबाट ढोका बन्द गर्थे। त्यस्तै आफूलाई जबर्जस्ती बियर खुवाएको पनि बालिकाले जाहेरीमा उल्लेख गरेकी छन्।

सुरेन्द्रले बालिकालाई ‘मेरो कोरियन भाषा कक्षा छ, म पढ्न जान्छु, एक घण्टापछि आउँछु र पुर्‍याइदिन्छु’ भनेर उनी निस्किन्छन्। ढोकामा बाहिरबाट ताल्चा लगाइदिन्छन्।

सुरेन्द्रबहादुर साढे नौ बजे आएर कोठामा पस्छन्। बालिकामाथि फेरि बलात्कार गर्छन्। केहीबेरमा दुबै जना बाहिर निस्किन्छन्। फुपूको घर पुर्‍याइदिन्छु भन्दै बालिकालाई अटोरिक्सामा राखेर अघि बढ्छन् र अलिक पर एउटा साँघुरो गल्लीमा ओह्रालेर आफू बेपत्ता हुन्छन्।

त्यसपछि बेवारिसे भएकी उनी बसपार्क गएर दैलेख जाने योजना बनाएर सडकमा हिंडिरहेको बेला चिनजानकी एक जना दिदी भेटिइन्।

किशोरीले एक्कासि आफू बिरामी भएको बताइन्। आमाबुबालाई आफू सुर्खेत आएको कुरा जानकारी नदिने सर्तसहित किशोरी ती दिदीको घरमा गइन्।

१० दिनसम्म ती दिदीको घरमा बसेकी किशोरीले आफ्नो पीडा बताउन चाहिनन्। ती दिदीले १० गते राति किशोरीका बुबालाई फोन गरेर किशोरीको अवस्थाबारे बताएपछि उनका बुवा यही भदौ ११ गते सुर्खेत आए।

बुबाले सोधीखोजी गरेपछि बालिकाले घटना सुनाइन्। भोलिपल्ट १२ गते बिहान बुबा प्रहरीमा पुगे। त्यसपछि प्रहरीले ती अटो चालकको खोजी गर्यो। उनलाई प्रहरीले १३ गते वीरेन्द्रनगरकै एरी चोकबाट पक्राउ गरेर अनुसन्धान अगाडि बढाएको छ।

प्रहरीले सुरेन्द्रविरुद्ध अपहरण तथा शरीर बन्धक र जबर्जस्ती करणीसम्बन्धी मुद्दा चलाएर अदालतबाट ५ दिनको म्याद थप समेत गरिसकेको छ।