जेठ १७, काठमाडौँ | साउदी अरेबियामा अवैध रुपमा बसेका ११८ जना नेपालीले एक्जिट (बहिर्गमन) भिसा पाएका छन् ।

साउदीस्थित नेपाली दूतावासको अनुरोधमा साउदी सरकारले ११८ नेपालीलाई बहिर्गमन भिसा दिएको हो । साउदी अरेबियाका विभिन्न कम्पनी तथा प्रतिष्ठानहरुमा कार्यरत रहँदा साउदी आवासीय अनुमतिपत्र (अकामा) नवनाईएका वा नवीकरण नगरिएकाहरू लगाइएका नेपालीहरुलाई स्वदेश फर्काउन आवश्यक वहिर्गमन भीसा (एक्जिट भिसा ) का लागि सम्बन्धित साउदी निकायमा अनुरोध गरिए अनुसार भिसा प्राप्त भएको दूतावासले जनाएको छ ।

दूतावासका अनुसार दुई हप्तामा रियादबाट प्रोसेसिङ् गरिएका मध्ये जम्मा ११८ जनाको वहिर्मन भिसा प्राप्त भएको छ । दूतावासले फेसबुक पेजमा प्रकाशित लिष्टमा नाम आएकाहरूले दूतावासमा गएर आफ्नो एक्जिट भिसाको पेपर लिएर जान समेत अनुरोध गरेको छ ।

दूतावासले प्रोसेसिङ गरेर प्राप्त हुने वहिर्गमन भिसाको सूचि प्रत्येक हप्ता दूतावासको फेसबुक पेजमार्फत् सार्वजनिक गर्ने जनाएको छ । उक्त सूचिमा दमाम, जुवेल, खोबर र अलहासास्थित अध्यागमन कार्यालयबाट प्राप्त हुने वहिर्गमन भिसाको विवरण समेत समावेश गरिने दूतावासले जनाएको छ ।

बहिर्गमन भीसा जारी भएकाहरुले भिसा जारी भएको ६० दिन भित्र साउदी अरब छोडिसक्नुपर्ने नियम छ । पछिल्लो समय त्यहाँका विभिन्न कम्पनीहरुले अकामा नबाईदिएको तथा कम्पनी छोडेर भागेर अन्य कम्पनीमा काम गरिरहेका नेपालीहरुलाई स्वदेश फर्किन एक्जिट भिसा आवश्यक पर्छ ।

अहिले साउदीमा ठूलो संख्यामा नेपालीहरु स्वदेश फर्किनको लागि एक्जिट भिसाको पर्खाइमा रहेका छन् । दूतावासले पनि एक्जिट भिसाको लागि प्रोसेसिङ भैरहेको र एक्जिट भिसा प्राप्त गर्नसाथ फेसबुक पेज मार्फत सार्वजनिक गर्ने जनाएको छ ।