वैशाख १४, काठमाडौँ । काठमाडौँ धापासी स्थित एसओएस म्यानपावर सप्लायर्स प्रालिको एजेन्ट बनेर अशुली गरिरहेको सूचना पाए लगत्तै काठमाडौँ स्थित कन्चन ह्युमन रिसोर्स म्यानेजमेन्ट प्रालिले बिर्तामोड स्थित आफ्नो शाखा कार्यालय खारेजीको लागि बिभागमा निवेदन दिएको छ । 

आफ्नो बिर्तामोड स्थित शाखा कार्यालयले बिभिन्न म्यानपावरसँग मिलेर अबैध एजेन्टको काम गरिरहेको सूचना साझा सबाल मिडियाको रिपोर्ट मार्फत जानकारी पाए लगत्तै म्यानपावर संचालक कविन्द्र किशोर घिमिरेले शाखा कार्यालय खारेजीको लागि वैदेशिक रोजगार बिभागमा निवेदन दिएका हुन् । बिर्तामोड स्थित कन्चन ह्युमनको शाखा कार्यालयले एसओएस म्यानपावरसँग मिलेर अबैध आर्थिक अशुली र एजेन्टको गतिबिधि गरिरहेको बिषयमा बिहिबार साँझ श्रम रोजगार तथा सामाजिक सुरक्षा मन्त्रालयमा निवेदन समेत परिसकेको छ । मन्त्रालयमा निवेदन पर्नु अगावै म्यानपावर संचालक घिमिरेले अबैध गतिबिधि गरेको विषयमा आफू जानकार नभएको र सूचना पाए लगत्तै सम्बन्धित शाखालाई कारवाही गर्ने बताएका थिए । 

बिभागमा बिहिबारनै म्यानपावर संचालक घिमिरेले दिएको निवेदनमा भनिएको छ - 'झापा जिल्ला बिर्तामोड नगरपालिका-१ मा रहेको आफ्नो म्यानपावरको शाखा कार्यालयको कार्य सम्पादन सन्तोषजनक नरहेकोले उक्त शाखामा कार्यरत जिवन घिमिरे लगायत अरु कर्मचारीहरुलाई अवकास दिई सो शाखा कार्यालय बन्द गर्ने निर्णय भएकोले सो शाखा कार्यालय बन्द गरि पाउँ ।'  

नेपाल एचआरको बिर्तामोड शाखा अवैध !

एसओएससंग मिलेर बिर्तामोडमा एजेन्टकै धन्दा चलाउने नेपाल एचआर सोलुसन प्रालिको अर्को शाखा कार्यालय भने महिनौंदेखि अबैध रुपमा संचालनमा रहेको पाइएको छ । बिर्तामोड स्थित उक्त शाखा कार्यालयलाई नवीकरणनै नदिएको काठमाडौँ स्थित नेपाल एचआर सोलुसनको केन्द्रिय कार्यालयका संचालक ब्रह्मदेव यादवले बताएका छन् ।

उनका अनुसार आठ-नौ महिना अघिनै उक्त कार्यालय अबैध भईसकेको छ । आफूले नवीकरण नदिएको अवस्थामा उक्त शाखाले आफ्नो म्यानपावरको नाम राखेकोबारे आफूलाई जानकारी नभएको भन्दै म्यानपावर संचालक यादव तर्किए । उक्त शाखाले अहिलेसम्म पनि 'नेपाल एच आर'कै बोर्ड र नाम राखेर धन्दा गरिरहेको विषयमा यादवले तत्काल बैदेशिक रोजगार बिभागमा उक्त शाखा संचालक बिरुद्ध उजुरी दिने बताए । मिडियामा एजेन्ट धन्दाको विषयमा रिपोर्ट सार्वनिक भएपछि उक्त अबैध शाखा कार्यालयका एजेन्ट गणेश सेढाई मोबाइल अफ गरेर बसेका छन् । 

सरकारले वैदेशिक रोजगारमा पठाउने म्यानपावरहरुले एजेन्टबिना कामनै नगरिरहेको विषयलाई अनदेखा गर्दा वैदेशिक रोजगारको बेथिति बढ्दै गएको छ । २०७२ यता फ्री भिसा फ्री टिकटको नीति लागू गरेको सरकारी निकायहरुले त्यसै नीतिलाई बार्गेनिङको खेल बनाएर स्वार्थ लिँदै गर्दा म्यानपावरहरुबीच अस्वस्थ प्रतिष्पर्धा र एजेन्टहरुको हालीमुहाली बढीरहेको छ । म्यानपावरहरुके सुध्रिन चाहेर पनि बाध्यतामा फस्दै गएको बताईरहेको बेला सम्बन्धित निकायको अनदेखाको परिणामले यो क्षेत्र बेथितिको हदैसम्मको दलदलमा भासिदै गएको छ ।  

सम्बन्धित भिडियो रिपोर्ट हेर्नुहोस्