माघ २२, काठमाडौँ । माघ १८ गते संचारकर्मी, युटुवर र पीडितहरुलाई केहि म्यानपावर व्यवसायी तथा गुण्डा लगाई आक्रमण गर्ने सामाखुसी स्थित त्रिपल स्टार म्यानपावरको वैदेशिक रोजगार अन्तर्गत कारोबार रोक्का गरि छानवीन प्रक्रिया थालिएको छ । 

बिभागले वैदेशिक रोजगारको क्रममा इजाजत लिएकाहरुलाई कारवाहीको प्रक्रियामा लैजाँदा उक्त म्यानपावरलाई 'इनएक्टिभ' स्टाटसमा राख्ने गरेको छ । यो स्टाटसमा राखिनु भनेको उक्त म्यानपावर मार्फत हुने वैदेशिक रोजगारको सबै प्रक्रिया तथा क्रियाकलाप रोक्का हुने अवस्था हो । यस्तो अवस्थामा हुँदासम्म उक्त म्यानपावरले कुनै पनि कामदार वैदेशिक रोजगारमा पठाउन पाउँदैन । 

वैदेशिक रोजगारको प्रलोभनमा प्रतिव्यक्ति ७ लाख ५० हजार अशुली गरि भिजिट भिसामा पठाइएका युवाहरु युएईमा अलपत्र परेपछि पीडितका परिवारले मिडिया गुहारेका थिए । पीडितसँगै म्यानपावर पुगेका युटुवर तथा मिडिया कर्मी र पीडितहरुलाई केहि म्यानपावर व्यवसायी सहितको संलग्नतामा ठूलो संख्यामा आएको म्यानपावर पक्षका व्यक्तिहरुले कुटपिट गरेका थिए । कुटपिटको क्रममा मूलगेट नै लगाएर नियोजित रुपमै आफुहरुलाई कुटिएको मिडियाकर्मी तथा अभियान्ताहरुले बताएका छन् । कुटिनेहरुमा युटुवर मात्र थिएनन् । न्युज २४ का पत्रकार समेत थिए । उनको प्रेस ज्याकेट समेत च्यातेर लछार-पछार पारिएको थियो । 

घटनाको भत्सना गर्दै बिभिन्न आप्रवासी कामदारको हकहित सम्बन्धि काम गर्ने संघ/संस्थाहरुले जिल्ला मार्फत प्रधानमन्त्री तथा श्रम रोजगार तथा सुरक्षा मन्त्रालय समक्ष ज्ञापनपत्र समेत बुझाएका छन् । सामाजिक संजालमा समेत निकै चासोको साथ हेरिएको यो घटनालाई लिएर सरकारी निकायको समेत आलोचना भएको छ । घटनापछि युटूवरहरुको आतंक रोक्न भन्दै म्यानपावर व्यवसायीहरुले कार्यक्रमनै गरे पनि व्यवसायीहरुले सरकारले इजाजत दिएको प्रयोजन बाहेकको काम गर्नेहरुको पक्षमा आफूहरु नरहेको ध्यानाकर्षण गरेका थिए । उनिहरुले भिजिट भिसामा कामको लोभमा पठाउने क्रियाकलाप नगर्न व्यवसायी साथिहरुलाई आग्रह गरेका छन् । साथै कसैले कसैलाई पीडित बनाएको भए यथासक्य उद्दार गर्न समेत सुझाव दिएका छन् । 

सामाखुसी स्थित त्रिपल स्टार इम्लप्लोईमेन्ट प्रालिले गरेको अवैधानिक क्रियाकलापको यो घटना नै पहिलो पटक भने होइन । यसै म्यानपावर कम्पनीले गत बर्ष क्यानडा पठाउने प्रयोजनमा अवैधानिक अशुली गरेको थियो । आफ्नै म्यानपावर कम्पनीमाथि म्यानपावरले नै भाडा तिर्दै आएको फ्ल्याटमा तीन जना भारतीय नागरिकहरुको प्रयोग गरि नक्कली कम्पनी खडा गरेर क्यानडामा वैदेशिक रोजगारको अवैधानिक काम गरेको पाइएको थियो । रकम अशुली गरेको प्रमाण सहित पीडितहरुको उजुरीको आधारमा बिभाग टोलीले छापा मारेको थियो । बिभागले छापा मार्ने क्रममा म्यानपावरकै मिलिमतोमा नक्कली कम्पनीले नेपाली युवाहरुलाई विदेश पठाउने प्रलोभन दिएर काम गरेको पाइएको थियो । बिभागले छापा नमारेको भए सो कम्पनीबाट धेरै नेपाली पीडित हुने र सोको प्रमाणित आधार समेत नहुने अवस्थामा काम गरेको पाइएको थियो । अनुसन्धानको क्रममा क्यानडा पठाउने भनि खडा भएको कम्पनी नक्कली हुनुको साथै उक्त कम्पनी राखिएको ठाउँ म्यानपावरले नै दिएर भित्री सम्झौता गरि कम्पनि चलाईएको पाइएको थियो । बिभागले छापा मारेपछि तीन जना भारतीय नागरिक पक्राउ परेका थिए । 

सम्बन्धित भिडियो रिपोर्ट;