मङ्सिर २२, काठमाडौं । वैदेशिक रोजगार विभागले कतार प्रहरीमा रोजगारमा जाने भनी राहदानी वा रकम वुझाएका व्यक्तिहरुलाई सम्पर्कमा आउन अनुरोध गरेको छ ।
यसअघि विभिन्न इजाजतपत्रवाला संस्था(म्यानपावर) संस्थाले वैदेशिक रोजगारको लागि कतार प्रहरीमा पठाइदिने भनि विभागको पूर्व स्वीकृती विना अन्तरवार्ता संचालन गरिरहेको भन्ने प्राप्त सूचना एवम उजुरीको आधारमा विभागले एस.ओ.एस.म्यान पावर सर्भिस प्रा.लि.( इ.प.न.८०/०५२), होप इन्टरनेशनल प्रा.लि. ( इ.प.न.८५७/०६६/६७) र डि.डि ह्युमन रिसोस प्रा.लि.(१०४३/०७३/७४ ) मा आकस्मिकअनुगमन गरेको थियो । सो क्रममा आकस्मिक अनुगमन टोलीले अन्तरवार्ता संचालन गरिसकेको/गरिरहेको अवस्थामा टोलीले आवश्यक कागजात नियन्त्रणमा लिई हाल उल्लिखित संस्थाहरु उपर भइरहेको छानविन जारी राखेको छ । छानवीनको क्रममा उल्लिखित संस्थाहरुले वैदेशिक रोजगारमा कतार प्रहरीमा पठाइदिने भनि राहदानी/ रकम लिएको भनि विभिन्न व्यक्तिहरुवाट विभाग समक्ष उजुरी प्राप्त भइरहेको विभागले जनाएको छ ।
"यसर्थ वैदेशिक रोजगारमा कतार प्रहरीमा जाने भनि उल्लिखित म्यानपावर वा म्यानपावर सँग सम्बन्धित व्यक्ति वा अन्य कुनै म्यानपावरमा राहदानी वा रकम वुझाएका व्यक्तिहरुलाई आजको मितिले तीस( ३०) दिन भित्र यथेष्ट प्रमाण सहित वैदेशिक रोजगार विभाग वा नजिकको श्रम तथा रोजगार कार्यालय वा जिल्ला प्रशासन कार्यालयमा उजुरी दिनुहुन वा विभागको अनुगमन शाखाको इमेल ठेगना [email protected] मा मेल गरि उजुरी दिनुहोला ।" विभागले मंगलबार जारी गरेको सूचनामा उल्लेख छ ।
यस बिषयमा तपाइको प्रतिक्रिया...!