साउन ३, काठमाडौँ । साताको अन्तिम कारोबारमा सेयर बजार परिसूचक ५९ अंकले बढेर २४ सयको विन्दु पार गरेको छ । बिहीबार बजार ५९.६८ अंकले बढेको हो । योसँगै समग्र बजार परिसूचक २४२४.३२ मा कायम छ ।
यस दिन परिसूचक ९० अंकसम्म उकालो लागेको थियो । त्यसपछि केही मत्थर हुँदै कारोबारको अन्त्यमा ५९ अंकले बढ्यो । अघिल्लो कारोबारको दिन (बुधबार)मा बजार ५४ अंकले बढेको नेपाल स्टक एक्सचेन्ज (नेप्से)ले जनाएको छ ।
बजारसँगै कारोबार समेत उच्च भएको छ । १५ अर्ब ५४ करोड ८८ लाख ७३८ रुपैयाँबराबरका तीन करोड ९९ लाख ३८ हजार २३७ कित्ता सेयर एक लाख ८४ हजार ७१२ पटकमा खरिद–बिक्री भयो । अघिल्लो कारोबारका दिन १२ अर्ब पाँच करोड रुपैयाँबराबरको सेयर खरिद–बिक्री भएको थियो ।
नेपाल इन्भेस्टमेन्ट बैंक, नेपाल फाइनान्स, आँखुखोला जलविद्युत् आयोजना, उपकार लघुवित्त, थ्री स्टार हाइड्रोको सेयर मूल्यमा सकारात्मक सर्किट ब्रेकर लाग्यो ।
बिहीबार १४३ कम्पनीको सेयर मूल्य बढ्यो । ९५ कम्पनीको सेयर मूल्य घट्यो ।
समूहगत उपसूचकतर्फ फाइनान्स समूह ३५.६९ र जलविद्युत् ०.२२ अंकले घट्यो । बाँकी ११ समूहको उपसूचक बढेका छन् । सबैभन्दा धेरै बैंकिङ समूह ८०.४९ अंक अर्थात् ६.२८ प्रतिशतले बढ्यो ।
यस बिषयमा तपाइको प्रतिक्रिया...!