गणेश सिर्पाली/भदौ २८, रुकुम । लामो कसरत पछि रुकुममा १० ओटा स्थानिय तह वनाउने सहमति भएको छ । २ नगरपालिका र ८ ओटा गाउँपालिका गरी १० ओटा स्थानिय तह बनाउने निर्णय गरिएको हो । 

स्थानीय तह पुनर्संरचना प्राविधिक सहयोग समिति रुकुम र जिल्ला स्थित राजनितिक दलहरुको बैठकले १० ओटा स्थानिय तह बनाउने सहमति गरेको हो । जिल्लाका विभिन्न ठाउँमा भएका कार्यक्रमबाट आएका सल्लाह, सुझाव र जिल्ला स्तरिय छलफलबाट जिल्लामा १० ओटा स्थानिय सरकार बनाउने सहमति भएको थानीय तह पुनर्संरचना प्राविधिक सहयोग समितिका संयोजक एवं स्थानिय विकास अधिकारी भरतकुमार शर्माले जानकारी दिनुभयो । 

जिल्लामा भएको निर्णयलाई स्थानीय तह निर्धारण आयोगमा पठाईने उहाँले बताउनुभयो । देशभरमा ५ सय ६५ ओटा स्थानिय तह रहने स्थानीय तह निर्धारण आयोगको प्रस्ताव अनुशार रुकुममा २ ओटा नगरपालिका र ४ ओटा गाउँपालिका गरी ६ ओटा स्थानिय तह हुने भनिएको थियो । 

तर जिल्लाको भौगोलिक अवस्था र सेवा सुविधा प्रवाहका हिसावले जिल्लामा स्थानिय तहको संख्या बढाउनुपर्ने आवाज उठेको थियो । जिल्ला भरबाट आएका सुझाव र प्राविधिक समिति तथा राजनितिक दलको छलफलबाट १० ओटा स्थानिय तहको माग गर्ने सहमति भएको प्राविधिक समितिका संयोजक शर्माले बताउनुभयो । 

अहिलेको सहमति अनुशार कोलको त्रिवेणी, हुकामको गरघाट, मोरावाङको सिसाघारी, रुकुमकोट, बाँफिकोटको छिनखेत, आठविसकोटको राडिज्युला, सिम्ली, मुसिकोट नगरपालिकाको खलंगा, रुघाँको सिमु्रुतुमा स्थानिय तहका केन्द्र बन्ने छन् । 

त्यस्तै चौरजहारी नगरपालिकाको केन्द्रभने तय भएको छैन् । चौरजहारी बजारमा केन्द्र बनाउने की खोलागाउँ चन्द्रबजारमा बनाउने भन्ने सहमति नजुट्दा केन्द्रको टुंगो नलागेको बताईएको छ । 

सिसफारिस गरिएका ९ ओटा स्थानिय तहको नामांकन पनि गरिएको छ । जसमा पुथा स्वायत्त, उत्तरगंगा स्वायत्त, भूम्या स्वायत्त, सिसाघारी, सिस्ने, स्यार्पू, मुसीकोट, सानी भेरी, त्रिबेणी नगर तथा गाउँपालिका वनाउने सहमति भएको हो । 

चौरजहारी नगरपालिका, खोलागाउँ, नुवाकोटका केहि वडा र पुर्तिमकाँडाका केहि वडाहरुलाई मिलाएर वन्ने नगरपालिको नाम भने स्थानीय तहको निर्बाचन पछिको नगर परिषदबाट गर्ने सहमति जुृटेको स्थानिय तह पुर्नसंरचना प्राविकि सहयोग समितिले जानकारी दिएको छ ।