नरी बडु/असोज २, बैतडी । जिल्लाको अधिकासं क्षेत्रमा गाँजाका विरुवाहरु आफै उम्रिन्छन् । 

मकैको डाँठ काटेपछि गाँउका खेतमा छरपष्ट रुपमा गाँजा देख्न सकिन्छ । तर पछिल्लो समय जिल्ला प्रहरी कार्यालय, बैतडी गाँजा नष्ट गर्ने अभियानमा सक्रिय देखिएको छ । गाँउमा रहेका युवाहरुलाई कुलतबाट बचाउन र चरेस नियन्त्रणका लागि गाँउ गाँउमा गएर गाँजा नष्ट गर्ने अभियान थालिएको जिल्ला प्रहरी कार्यालय बैतडीका प्रमुख हेरम्ब शर्माले बताए ।

“अधिकासं वेरोजगार युवाहरु जाँड रक्सी तथा गाँजाजन्य नसालु पदार्थको सेवनले दुव्र्यसनीमा फस्ने सम्भावना भएकाले हरेक गाँएमा प्रहरी युनिट खटाएर गाँजा नष्ट गर्ने अभियान चलिरहेको छ” उनले भने ।

जिल्लामा गाँजाको खेति गर्ने गरेका नभएपनि आफै उम्रने समस्या छ । केहि स्थानीयले आफै उम्रेको गाँजा नष्ट नगरिकन चरेस बनाउने लगायतका कानुन विपरित कार्य गर्ने गरेका छन् । 

जिल्लाको दशरथचन्द नगरपालिका, पुचौँडी नगरपालिका, पाटन नगरपालिका लगायत सबै क्षेत्रका खेतहरुमा प्रहरी र स्थानीयको सहयोगमा गाँजा नष्ट गर्ने गरिएको छ ।  

गाँजा र त्यसबाट बन्ने चरेसलाई नेपालको कानुनले सेवन गर्न था विक्रि वितरण गर्न बन्देज गरेको छ ।  गाँजा नष्ट गर्नु अघि स्थानीय व्यक्तिहरु संग गाँजाबाट हुने हानी र कानुनबारे जानकारी गराई गाँजा नष्ट गरिरहेको डिएसपी शर्माले बताए । 

सदरमुकाम क्षेत्रमा लुकिछिपी गाँजा सेवन गर्ने गरेको भएपछि गाँउघरतिर यसको सेवन निकै भएको पाईन्छ । 

गाँजा सेवन तथा विक्रिवितरण कानुन विपरित भएकाले यस्तो कार्य कसैले पनि नगर्न जिल्ला प्रहरी कार्यालयले सबैमा आग्रह गरेको छ । 

गाँजा नष्ट संगै बस्ती भेटघाटपनि 

जिल्लामा रहेका विभिन्न प्रहरी चौकि, इलाकाका इन्चार्ज र जिल्ला प्रहरी प्रमुख डिएसपी को नेतृत्वमा गाँजा नष्ट गर्न गाँउ गएका प्रहरीहरुले बस्ती भेटघाट समेत गर्ने गरेका छन् । 

समाजमा घट्ने विभिन्न प्रकारका घटना नियन्त्रण र स्थानीयहरुलाई सचेत गराउन प्रहरीले यस्तो अभियान चलाएको हो । दुर्गमका गाँउमा समस्याका रुपमा रहेको मादकपदार्थ सेवन, घरेलु हिंसा र अन्य दुव्र्यसनी लगायतका विषयमा स्थानीयलाई जानकारी गराउने गरेको जिल्ला प्रहरी कार्यालयले जनाएको छ । 

कानुनको अज्ञानताले समाजमा विभिन्न किसमका विकृती र विसंगतीहरु बढ्नुका साथै अपराधिकरण पनि बढ्ने भएकाले गाँउमा पसेका बेला यसबारेमा छलफल हुने गरेको जिल्ला प्रहरी प्रमुख डिएसपी शर्माको  भनाई छ । 

पछिल्लो समय बैतडीमा आत्माहत्या गर्नेको संख्या बढ्दै गएकाले आत्माहत्या घटाउनका लागि पनि बस्ती भेटघाट जरुरी रहेको उहाँको भनाई छ । 

सुदूरपश्चिमको महान चाँड गौरा सकिए संग नजिकिन लागेको बडा दशै र तिहारको अवसरमा हुने अपराधिक घटना घट्न नदिन समेत प्रहरीले विषेस सुरक्षा योजना अघि सारेको छ ।  दशैको वेलामा गाँउमा विडभाड हुने भएकाले प्रहरीलाई तुलनात्मक रुपमा चनाखो बनाईएको शर्माले बताए । 

“चाँडबाडको समयमा जिल्लामा संचालन हुने विभिन्न सवारी साधनका चालकहरुले मादकपदार्थ सेवन गरी सवारी हाक्ने सम्भावना भएकाले त्यसतर्फ पनि विषेस ध्यान दिएका छौँ” उनले भने ।