ताराबहादुर महत । भाद्र ३१, दोलखा । जोखिम भत्ता कटौतिको विरोधमा गत बुधबारदेखि बन्द भएको प्रस्तावित चरिकोट अस्पतालको प्रयोगशाला र रेडियोलोजी सेवा भोलिदेखि शुचारु हुने भएको छ ।

शुक्रबार रातिसम्म न्याय हेल्थ नेपाल र अस्पतालको प्रयोगशाला तथा रेडियोलोजी विभागमा कार्यरत कर्मचारीहरुविच भएको छलफलबाट यसअघि दिँइदै आएको जोखिम व्यवस्थापन भत्तालाई निरन्तरता दिने सहमति भएपछि आफूहरु सेवा शुचारु गर्न तयार भएको प्रयोगशालाका कर्मचारी सन्तोष पोखरेलले जानकारी दिनुभयो ।

अस्पतालका निर्देशक वुसन प्रसाँईले भने संस्थाको बृहत सेवा तथा सुविधा सम्बन्धि अध्ययन समितिले अध्ययन गरेर जोखिम भत्ता मात्र नभई कर्मचारीहरुको हकहितका लागि कानुनी प्रावधान अनुरुप सेवा सुविधा दिने सहमति भएको बताउनुभयो। सार्वजनिक निजी साँझेदारी मोडलमा संचालित स्वास्थ्य संस्थाले नेपाल सरकारद्वारा जारी ‘प्रयोगशाला तथा रेडियोलोजि जोखिम भत्ता व्यवस्थापन निर्देशिका, २०७२’ मा भएको प्रावधान बाध्यकारी देखिएमा कर्मचारीहरुको जोखिम भत्ता चालु आर्थिक बर्षको शुरुवातदेखिको नै दिएर कर्मचारीहरुको मनोबल बढाउन आफूहरु  तयार रहेको निर्देशक प्रसाँईको भनाई छ । आफूहरु भत्ता कटौतिको पक्षमा नरहेको भएपनि बजेट अभावले भत्ता निरन्तरता गर्न नसकिएको उहाँले बताउनुभयो ।

गत आर्थिक बर्षको पुषदेखि असारसम्म भत्ता दिईएको भएपनि २०७४ श्रावणदेखि भत्ता नदिईएको भन्दै त्यस विभागका कर्मचारीहरुले गत बुधबारदेखि आपतकालिन बाहेकका सबै सेवा अबरुद्ध पारेका थिए ।  चरिकोटस्थित प्रस्तावित चरिकोट अस्पतालको प्रयोगशाला तथा रेडियोलोजी विभागका कर्मचारीहरुले आपतकालिन बाहेकका सेवा ठप्प पारपछि सैयौं विरामीहरु सेवा लिनबाट बञ्चित भएका थिए । प्राथमिक स्वास्थ्य केन्द्र चरिकोट र न्याय हेल्थ नेपाल नामक गैर सरकारी संस्थाको साँझेदारीमा संचालित अस्पतालमा दैनिक औषत ३ सय जना विरामीले सेवा लिने गरेको अस्पताल श्रोतको भनाई छ ।