सास । भदौ ९, बर्दिया । 

महिलाहरुको पर्व हरितालिका तीजको अवसर पारेर बढैयाताल गाउँपालिका वडा नं. ३ मा आयोजित तीज महोत्सवको समारोहमा जनप्रतिनिधीहरुलाई सम्मान गरिएको छ ।

भोलागौडी बजार व्यवस्थापन समितिको आयोजना तथा माछापुच्छ्रे युवा क्लब भोलागौडीको सह आयोजनामा आयेजित तीज विशेष कार्यक्रममा विहिबार बढैयाताल गाउँपालिकाका अध्यक्ष लाल बहादुर श्रेष्ठ तथा उपाध्यक्ष दीपा गौतम लगायत सबै वडाका प्रतिनिधनिधी तथा गाउँ कार्यपालिकाका प्रतिनिधीहरुलाई सम्मान गरिएको हो ।

बजार नजिकै रहेको खेल मैदानमा आयोजित तीज महोत्सवमा लोक तथा दोहोरी गायक गायिकाहरु शेर बहादुर आचार्य ‘गाइने’, सुनिता वि.सी., आकृति ढकालले आ–आफ्ना साङ्गीतिक प्रस्तुतीहरु राख्नुभएको थियो भने आफ्ना साङ्गितीक प्रस्तुतीहरुका साथमा आकर्षक तरीकाबाट कार्यक्रमको सहजीकरण गायक तथा सञ्चारकर्मी प्रभात सुवेदीले गर्नुभएको थियो । कार्यक्रमा गुलरियाको गोल्डेन फ्युचर डान्स सेन्टरका कलाकारहरुले आकर्षक नृत्य प्रस्तुत गरेका थिए भने स्थानीय कलाकारहरुले पनि आ–आफ्नो प्रतिभाहरु प्रस्तुत गरेका थिए । 

महोत्वसमा तीज गीत प्रतियोगिताको समेत आयोजना गरिएको थियो । प्रतियोगितामा मौलिक लय तथा सामाजिक विषयवस्तुहरुका बारेमा प्रस्तुतीहरु गरिएका थिए । 

कार्यक्रममा हजारौंको सहभागीता रहेको यो कार्यक्रममा साँझ अबेरसम्म पनि दर्शकहरुको उत्साहजनक सहभागिता रहेको थियो । 

नेपाली महिलाहरुको महान् पर्वको अवसर पारेर आयोजना गरिएको कार्यक्रमका मुख्य उद्देश्य नेपाली मौलिक कला संस्कृतिको जर्गेना गर्दै स्थानीय कला संस्कृतिको मौलिकता जोगाउनु रहेको बजार व्यवस्थापन समितिका अध्यक्ष तथा कार्यक्रमका सभाध्यक्ष रवीन्द्र रावलले बताउनुभयो ।