दान बहादुर बुढा/फागुन २४, मुगु । नेपाल पत्रकार महासंघ मुगु शाखाको आगामी फागुन २६ गते हुन गईरहेको चौंथो जिल्ला अधिवेशनका लागि रित नपुगि अधिवेशनको अन्तिम संघारमा केन्द्रबाट सोझै सदस्यता नविकरण गरि पठाएका सदस्यतालाई अमान्य हुने निर्णय गरेको छ  ।

शाखाको सोमवार गमगढीमा बसेको बैठकले महासंघसंग यस अघि आवद्ध भएका तर वेला वेला सदस्यता नविकरण गर्न सार्वजनिक सुचना जारी गर्दा पनि शाखामा कुनै सम्पर्क नराखेर नविकरण शुल्क समेत नबुझाई एकै चोटी महासंघको केन्द्रीय कार्यालयबाट अधिवेशन हुनु एक दुई दिन पुर्व शाखाको साधारण सदस्यता नविकरण गराएको सुचिमा परेका सदस्यहरुलाई रित नपुगेको अमान्य ठहर हुने भन्दै  अधिवेशनको बन्द सत्रमा समावेश नगराउने निर्णय गरेको शाखाका सचिव दानबहादुर बुढाले जानकारी दिए ।

 महासंघको सदस्यता नविकरण गर्दा संघको विधान बमोजिम सार्वजनिक सुचना भएको अवधि भित्र तोकिएको मापदण्ड अनुसार सम्बन्धित शाखाको सिफारिस भएपछि मात्र केन्द्रीय समितिले नविकरण गर्ने भए पनि नविकरणका लागि पटक पटक सुचना जारी गर्दा समेत सम्पर्कमा नआउने र अधिवेशन हुने वेला एकाएक केन्द्रबाट सदस्यता नविकरण गरि पठाउने प्रचलनले जिल्ला शाखामा विवाद उत्पन्न हुने गरेकाले अब देखि जिल्ला शाखाको सिफारिस विना नै केन्द्रीय समितिले नविकरण गरेका सदस्यता अमान्य हुने पत्रकार महासंघ मुगु शाखाले जनाएको छ । नेपाल पत्रकार महासंघ केन्द्रीय समितिले हालसम्म पनि मुगु शाखामा आवद्ध रहेका शाखाका सदस्यहरुको सदस्यता नविकरण सुचि समेत नपठाएको शाखाले जनाएको छ । यस अघि २२ जना सदस्यता आवद्ध रहेको शाखाका सदस्य मध्य १५ सदस्यले मात्र सदस्यता नविकरणका लागि शाखामा आवेदन दिएका थिए ।

 बैठकले आउदो फागुन २६ गते हुन लागेको शाखाको चौंथो जिल्ला अधिवेशन सम्पन्न गर्न जिल्लामा क्रियाशिल रहेका सञ्चार कर्मिहरु र महासंघका सम्पुर्ण कार्य समितिलाई सक्रिय भएर जुट्न आव्हान समेत गरेको छ । 

सोमबार गमगढीमा बसेको शाखाको बैठकले जिल्लामा क्रियाशिल पत्रकारहरुलाई सम्मान प्रदान गर्नका लागि शाखाका अध्यक्ष सुमन मल्लको संयोजकत्वमा तिन सदस्यीय उत्कृष्ट पत्रकारिता सम्मान छनौट समिति गठन गरेको छ । त्यस्तै  कोषाध्यक्ष नृपेन्द्रबहादुर मल्लको संयोजकत्वमा ३ सदस्यीय आर्थिक व्यवस्थापन उपसमिति समेत गठन गरेको छ ।