नरी बडु/पुस ७, बैतडी । बैतडीमा जिल्लामा बिहिबारदेखि पहिलोपटक स्वास्थ्य बीमाको दर्ता प्रक्रिया सुरु भएको छ । 

नेपाली काग्रेस क्षेत्र नम्बर २ का सांसद नरबहादुर चन्दले पहिलो सदस्यका रुपमा विमा गरी स्वास्थ्य विमाको उद्घाटन गरेका हुन् । सामाजिक स्वास्थ्य सुरक्षा विकास समिति बैतडीले बिहिबार जिल्ला विकास समितीको कार्यालयमा आयोजना गरेको स्वास्थ्य विमा सुभारम्भ कार्यक्रममा चन्दले पहिलोपटक स्वास्थ्य विमा गरेका हुन् ।

आजदेखि जिल्लामा स्वास्थ्य विमा कार्यक्रम सुरु भएको सामाजिक स्वास्थ्य सुरक्षा विकास समितीका कार्यकारी निर्देशक डक्टर गुणराज लोहनीले बताए । गरिब, विपन्न र पछाडी पारिएका नागरिकको स्वास्थ्य सेवामा पहुँच पु¥याउनका लागि स्वास्थ्य बीमा कार्यक्रम सञ्चालनमा ल्याइएको लोहनीले बताए ।

देशभरीका तीन जिल्ला कैलाली, बाग्लुङ र इलाममा उक्त कार्यक्रम गएको चैत्र देखिनै सुरु भैसकेको छ । चौथो जिल्लाको रुपमा बिहिबारदेखि बैतडीमा यो कार्यक्रम सुरु भएको हो सुदूरपश्चिमका बैतडी र अछाम सहित २५ जिल्लामा कार्यक्रम विस्तार गरिने उहाँले बताए ।

स्वास्थ्य बीमा कार्यक्रम अन्तर्गत पाँच जनाको परिवारले रु दुईहजार पाँचसय जम्मा गर्नुपर्ने र एक वर्षसम्म रु ५० हजार उपचार निःशुल्करुपमा प्राप्त गर्ने निर्देशक लोहनीको भनाई छ । यस्तै, पाँचजना भन्दा बढी परिवारका सदस्य भएमा रु चारसय २५ का दरले थप शुल्क तिर्नुपर्ने हुन्छ ।

जिल्लामा स्वास्थ्य बीमा कार्यक्रम सञ्चालनका लागि ७० जना दर्ता कर्मचारी छनौट गरिएको र उनीहरुले प्रत्येक घरदैलोमा गएर स्वास्थ्य बीमाका बारेमा जानकारी गराउनाका साथै सदस्यता वितरण गर्ने सामाजिक स्वास्थ्य सुरक्षा विकास समिति बैतडीका प्रवन्धक नरेस चौधरीले बताए । उनिहरुलाई अनलाई सिस्टमबाट विमा दर्ता गर्न सजिलो  होस भन्ने उद्देश्यले एन्ड्रोइड फोन समेत वितरण गरिएको छ । पुस महिनाभरि दर्ता भएकाले फागुनदेखि स्वास्थ्य बीमाको सेवा पाउने चौधरीको भनाई छ ।

यो कार्यक्रमले अति गरिब र विपन्न वर्गलाई निसुल्क विमा गराउने भनेपनि जिल्लामा गरिब परिवारको पहिचान नहुदा समस्या भएको छ । जिल्लामा अहिलेसम्म नेपाल सरकारले गरिब परिचयपत्र वितरण गरेको छैन् ।

तस्बिरमा नेपाली काग्रेस क्षेत्र नम्बर २ का सांसद नगरबहादुर चन्दको अनलाईन सिस्टमबाट फम दर्ता गरी बैतडी जिल्लामा विमा कार्यक्रम सुरु गर्दै सामाजिक स्वास्थ्य सुरक्षा विमा समितीका कर्मचारी । तस्बिर: नरी बडु, साझासवाल