प्रभात सुवेदी । पौष २, बर्दिया ।

यसै त पहिलो शनिबार गुलरिया बजार बन्द हुने दिन झन् उसैमाथि हिजोदेखि नेकपा एमालेको बन्दका कारण पनि सुनसान बनेको राधाकृष्णचोक भने अपरान्ह अकस्मात भावुकतामा परिणत भयो । 

बर्दियाली कलाकार राम बहादुर कुँवरको १३औँ दिनको पुण्य तिथिमा आयोजित श्रद्धाञ्जली सभामा उपस्थित सम्पूर्ण व्यक्तित्वहरुमा भावुकताले छाएको थियो । वहाँकै सम्झनामा श्रद्धाका शब्दहरु बुनेर गीत गाइरहँदा कलाकार मनोज भण्डारी आँफै भावुक बन्नुभएको थियो भने उपस्थित जनसमुदाय तथा परिवारका सदस्यहरुको पनि मन थामिन सकेको थिएन । 

एमाले निकट जनसाँस्कृतिक महासंघ नेपाल बर्दिया, राष्ट्रिय लोक तथा दोहोरी गीत प्रतिष्ठान नेपाल र सूर्योदय साँस्कृतिक प्रतिष्ठान बर्दियाको संयुक्त आयोजनमा सम्पन्न श्रद्धाञ्जली सभामा कलाकार राम बहादुर कुँवरको व्यक्तित्व र कलाकारितामाथि चर्चा परिचर्चा गरिएको थियो । 

वहाँको आत्माको चिर शान्तिको लागि कुँवरकी जेठी छोरी अन्जु कुँवरलाई समवेदनापत्र प्रदान गर्नुहुँदै  व्यवस्थापिकका सा‌सद लीला रानाले वहाँले जनताका गीतहरु गाएर जिल्लाका कुनाकुनामा पुगेको स्ममरण गर्नुहुँदै मृत्यु मानव जीवनको स्वभाविक प्रक्रिया भएतापनि वहाँको योगदानका कारणले गर्दा नै यसरी संझिएको स्मरण गर्नुभयो । 

नेकपा एमाले जिल्ला कमिटि अध्यक्ष हरि ज्ञवालीले राम बहादुर कुँवर आफ्नो कर्तव्य प्रति इमान्दार हुनुभएको स्मरण गर्नुहुँदै श्रद्धाञ्जली व्यक्त गर्नुभयो । कार्यक्रममा समकालीन सहकर्मी कलाकार महादेव गुरुङ्ग, नरेन्द्र श्रेष्ठले वहाँ अत्यन्तै खुवी भएको कलाकार हुनुहुन्थ्यो र घर परिवारको पनि वास्ता नगरी कलाकारितामा नै होमिएर लाग्ने व्यक्तित्वका रुपमा स्मरण गर्नुभयो । कार्यक्रममा कलाकारहरु संजिव खड्का, शम्भु सुनारले श्रद्धाञ्जली गीत प्रस्तुत गर्नुभएको थियो । 

कार्यक्रम जनसाँस्कृतिक महासंघ नेपाल जिल्ला कार्यसमिति बर्दियाका अध्यक्ष विष्णु थापाको सभाध्यक्षमा सम्पन्न गरिएको  हो ।

कलाकार कुँवरका रेलको ईन्जन, लाली बजारमा, जु¥यो लगन गीती एल्बमहरु प्रकाशित रहका छन् भने वहाँको गत मंसिर २० गते आफ्नै निवास गुलरिया ४ खैरीमा निधन भएको थियो ।