(सास) असोज २१, बैतडी | जिल्लाको मल्लादेहि गाविसका दलितहरुले उक्त क्षेत्रको दलित मानव अधिकारको अवस्था अनुगमन गरिदिन अनौपचारिक क्षेत्र सेवा केन्द्र (इन्सेक) लाई ०७३ असोज २१ गते संयुक्त हस्ताक्षर सहितको लिखित निवेदन दिएका छन् ।

वडादशैका अवसरमा उक्त क्षेत्रमा अवस्थीत श्री डिलाशैनि भगवतीको मन्दिरमा राँगा बलि दिने चलन रहेको र गैरदलितहरुले बलि गरेका राँगाहरुको सिनो दलितहरुले खानुपर्छ भन्ने रुढीबादि दबाव दिने गरेकाले स्थानीय दलित र डिलाशैनि सेवा समितीको हस्ताक्षर सहितको निवेदन इन्सेकलाई दिएका हुन ।

विजया दशमिको दिन मेला लाग्ने उक्त मन्दिरमा गैरदलितहरुले राँगा बलि दिने चलन छ । तर केहि वर्ष अगाडी देखि दलिहरुले सिनो खान अस्यूकार गरेको डिलाशैनि सेवा समितीका सदस्य एवम् स्थानीय दलित अगुवा राजेन्द्र लुहारले बताए ।

समिती र हामिले जस्ले राँगा बलि गर्यो उसैले व्यवस्थापन गर्नुपर्छ भन्ने निर्णय गरेकाले अपराधिक मनस्थिति भएका व्यक्तिहरुले आफुहरुमाथि अपराधिक गतिविधि गर्न सक्ने सम्भावना रहेकाले अनुगमनका लागि मानव अधिकारको क्षेत्रमा काम गरिरहेको संस्था इन्सेकलाई निवेदन दिएका छन् ।

दलित अगुवा लुहारले स्थानीय दलित समुदायको नेतृत्व गर्दै बैतडीका इन्सेक प्रतिनिधि नरी बडुलाई निवेदन बुझाएका हुन् । साथै उनिहरुले सुरक्षाको माग गर्दै जिल्ला प्रशासन कार्यालय र जिल्ला प्रहरी कार्यालयलाई पनि निवेदन दिएका छन् ।

“बलि दिने समयमा जिल्लाका अन्य भगवतिका मन्दिरहरुमा पनि दलितहरुमाथि विभेद हुने भएकाले जिल्लाका अन्य मन्दिरहरुको पनि अनुगमन गरिदिनुहोस” लुहारले इन्सेक प्रतिनिधि नरी बडुलाई भने ।

तश्विरमा: सुरक्षाको माग गर्दै बैतडीका प्रमुख जिल्ला अधिकारी किशोर कुमार चौधरीलाई निवेदन बुझाउदै जिल्लाको मल्लादेहि गाविसका दलित अगुवा राजेन्द्र लुहार | तस्बिरः नरी बडु/इन्सेक प्रतिनिधि बैतडी