माघ २३, काठमाडौँ | स्वतन्त्र सांसद डा. अमरेशकुमार सिंहले प्रधानमन्त्री दाहालसँग भेट गरेका छन् । प्रधानमन्त्री दाहाल र उनकी छोरी गंगा दाहालबारे मिडियामा विभिन्न आरोप लगाएर चर्चामा आएका सांसद सिंहले आज (मंगलबार) प्रधानमन्त्री दाहालसँग भेट गरेका हुन् ।

प्रधानमन्त्री दाहालसँग हिजो संसद् भवनमा भेट हुँदा एकचोटी भेट्नको लागि बिन्ती गरेपछि आज दाहालले सिंहलाई भेट दिएका हुन् । सिंहदरबारस्थित् प्रधानमन्त्रीको कार्यालयमा भएको भेटमा सिंहले प्रधानमन्त्री दाहालसँग विभिन्न विषयमा भलाकुसारी गरेका हुन् ।

सुरुमा सिंहले प्रधानमन्त्री दाहालकी छोरी गंगासँग माफी मागेको स्रोतको दाबी छ । गंगाले आफूले प्रधानमन्त्री दाहाललाई सफल बनाउनको लागि सचिवालयमा बसेर काम गरेको भन्दै किन अनावश्यक आरोप लगाएको भनेर जिज्ञासा राखेकी थिईन् ।

दाहालको जिज्ञासा भुईंमा खस्न नपाउँदै सिंहले आफूले प्रधानमन्त्री दाहालसँग भेट्न नपाएको र शान्ति प्रक्रियाको लागि आफूले खेलेको भूमिकाको मूल्यांकन नभएको कारण आवेशमा आरोप लगाएको भन्दै माफी मागेको स्रोतको दाबी छ ।

मलेसियन कम्पनी आजियाटाले एनसेलमा रहेको आफ्नो समित्व बेचेर नेपालबाट बाहिरिने निर्णय गर्नासाथ विवादमा मुछिएपछि सांसद सिंहले प्रचण्डलक्षित विभिन्न टिप्पणी गरेका थिए । ‘प्रधानमन्त्रीकी छोरी तथा स्वकीय सचिव गंगा दहालले कुन–कुन ब्यापारीसँग कुन–कुन मामिलामा कति रकम बुझेकी छिन् त्यो सबै प्रमाण मसँग सुरक्षित छ’ सांसद सिंहले सामाजिक सञ्जालमा स्टाटस लेख्दै भनेका थिए, ‘समय आएपछि त्यो सबै प्रमाण जनता र मिडियामा लिएर जानेछु ।’

सांसद सिंहको उक्त स्टाटसपछि प्रधानमन्त्रीको सचिवालयले खण्डनसमेत गरेको थियो । प्रधानमन्त्रीको सचिवालयले प्रधानमन्त्री र सचिवालयका कसैको पनि एनसेल र त्यस प्रकरणमा कुनै पनि व्यक्तिसँग मिलेमतो त परै जाओस् सामान्य संवादसम्म पनि नभएको स्पष्ट पारेको थियो । सचिवालयले कुनै तथ्य प्रमाणबिना यस प्रकारका झुट्टा प्रचार नगर्न सम्बन्धित सबैमा आग्रह गरेको थियो भने माओवादी केन्द्रका नेताहरुले अमरेशलाई ठेगानमा बस्न नत्र आफूहरुले ठेगान लर्गादिेन चेतावनी दिएका थिए ।

सर्लाही–४ बाट स्वतन्त्र उम्मेद्वारको रुपमा चुनाव जितेका डा. सिंह चर्चामा आइरहने नेताको रुपमा चिनिन्छन् । उनी ०७९ साल पुष १० गते प्रचण्ड एमालेसहितको गठबन्धनबाट प्रधानमन्त्री बन्दा प्रचण्डको साथमा उभिएका थिए ।

कतिपयले प्रचण्डले आफूलाई मन्त्री बनाउने वचन दिएरपनि नबनाएकोले सिंहले अहिले आक्रोश पोख्ने गरेको भनेर पनि दाबी गर्ने गरेका छन् ।