कार्तिक २२, रौतहट | रौतहटमा बम विस्फोट गरी सामूहिक नरसंहार गरेको अभियोगमा पुर्पक्षका लागि थुनामा रहेका नेपाली कांग्रेसका नेता मोहम्मद अफताब आलमको मुद्दामा अन्तिम बहस सकिएको छ। रौतहट जिल्ला अदालतमा केही दिनदेखि चलेको बहस बुधबार सकिएको जिल्ला अदालतका स्रेष्तेदार उद्धव ढोडारीले बताए।

‘मुद्दामा पक्ष,विपक्षी र सरकारी वकिलका साथै पीडितका तर्फबाट पनि बहस सकिएको छ,’ उनले भने, ‘यो मुद्दा धेरै गम्भीर र ठूलो भएका कारण फैसलाअघि केही आदेश गरेको छ।’

जिल्ला अदालत रौतहटका स्रेस्तेदार ढोडारीका अनुसार जिल्ला अदाललते १५ दिनभित्र बहस नोट पेस गर्ने पक्ष र विपक्षीका साथै सरकारी वकिललाई पनि आदेश गरेको छ। यस्तै अदालतका कर्मचारीहरुलाई मुद्दाको सार संक्षेपीकरण  बनाएर इजलासमा पेस गर्न पनि आदेशमा भनेको छ।

वादी, प्रतिवादी र सरकारी वकिलबाट बहस नोट मगाउने र १५ दिनभित्र पेसी राखेर अन्तिम फैसला सुनाउने आदेश भएको उनले बताए। यसका लागि मुद्दा हेर्दा हेर्दै राखिएको छ। यसअघि नै सरकारी वकिल र आलमका कानुन व्यवसायीले बहस गरेका थिए। जिल्ला न्यायाधीश बाबुकाजी बानियाँको इजलासमा उनको मुद्दामा अन्तिम बहस सुरु भएको थियो।

पीडितका तर्फबाट सुरुमा बहस भएको थियो भने मंगलबार सरकारी पक्षले पनि बहस थालेका थिए। बुधबार सरकारी पक्षको बहस सकेर पीडितका तर्फबाट बहस भएको थियो।

केही दिनदेखि उक्त मुद्दामा बहस चलिरहेको थियो। अब बहस नोट पेस भएपछि जिल्ला अदालतले फैसला सुनाउने छ। सरकारी वकिल कार्यालय रौतहटका जिल्ला न्यायाधिवक्ता बद्रीकुमार कार्कीको नेतृत्व आलमलाई सफाइ दिन नमिल्ने दाबीसहित बहस गरेका थिए।

पीडितका तर्फबाट बहस गर्न काठमाडौंबाट केही अधिवक्ताहरु पुगेका थिए। अधिवक्ता पुष्प पौडेलसहितका केही अधिवक्ताहरुले बुधबार बहस गरेका छन्। उनीहरुले आलमलाई सर्वस्वसहित जन्मकैद हुनुपर्ने माग गरेका थिए।