पुस ११, काठमाडौं | बाहुबलीपछि दक्षिण भारतीय अभिनेता प्रभासको करियर आकाशिएको थियो । विश्वभर नै उनको फ्यान फलोइङ बढ्न थाले । 

बाहुबली अल टाइम ब्लकबष्टर फिल्म बन्यो । यसपछि उनले आफ्नो फिस पनि बढाइदिए । २२ वर्षको फिल्मी करियरमा प्रभासको पोल्टामा हिटभन्दा धेरै फ्लप फिल्म थिए । 

बाहुबली यता त उनले झन् एउटै हिट दिन सकेनन् । कतिले उनको करियर अब डुब्यो समेत भनिदिए । यस्तोमा सालारले उनको डुब्नै लागेको करियरको डुंगालाई किनारा लगाइदिएको छ । सालार हिट भएसँगै प्रभसले अर्को रेकर्ड पनि आफ्नो नाममा बनाएका थिए ।

दक्षिण भारतीय फिल्म उद्योगका सुपरस्टार प्रभासको फिल्म सालारले बक्स अफिसमा तहल्का मच्चाइरहेको छ । पहिलो दिनमै सय करोड भारु भन्दा धेरै कमाउने सालार प्रभासको चौथो फिल्म हो । सालारले वर्ल्डवाइड बक्स अफिसमा पहिलो दिन १७८ करोड भारु कमाएको  थियो । यस्तो रेकर्ड दक्षिण भारतीय फिल्म उद्योगका सूर्या, धनुष, थलपति विजयजस्ता स्टारहरुले समेत बनाउन सकेका छैनन् ।

बाहुबलीको दुबै भाग रिलिज भएलगत्तै प्रभासको लोकप्रियता बढेको थियो । उनको आगामी फिल्मप्रति दर्शकहरुले निकै आशा गरेका थिए । तर निकै आशा गरिएको आदिपुरुषले दर्शकहरुलाई निराश बनायो । 

सालारको साथमा प्रभासले आफ्नो धमाकेदार पुनरागमन गरेका छन् । दर्शकहरुले पनि यो फिल्मलाई निकै माया दिइरहेका छन् । सालार उत्तर अमेरिकामा सबैभन्दा धेरै कमाउने दक्षिण भारतीय फिल्म बनेको छ ।

खबरहरुका अनुसार फिल्मले पहिला सप्ताहन्तमा उत्तर अमेरिकामा ५० लाख डलरको ओपनिङ गरेको छ । उत्तर अमेरिकामा ५० लाख डलर कमाउने यो प्रभासको तेस्रो फिल्म हो । 

यस अघि बाहुबली १ र २ ले पनि यती नै कमाइ गरेको थियो । विदेशमा मात्रै होइन भारतमा पनि सालारको कमाई धमाकेदार छ । दक्षिण भारतमा मात्रै नभएर भारतीय बेल्टमा पनि फिल्मले राम्रो कमाइ गरिरहेको छ ।