पुस २३,काठमाडौँ, एजेन्सी | कोरोना र यसको नयाँ भेरियन्ट ओमिक्रोनबाट संक्रमितहरूको संख्या बढेपछि धेरै नेपालीहरूको गन्तव्य रहेको मध्यपूर्वका देशहरूमा पुनः कडाइ गरिएको छ । 

कुवेत

अक्टोबर अन्तिम साताबाट कोरोनाको डरबाट मुक्त हुन कुवेतले आफूलाइ ‘मास्क फ्रि’ घोषणा गरेको थियो । तर, सधैका लागि कदम कायम रहन सकेन । पुनः कोरोनाका संक्रमित बढन थालेपछि कुवेतले केही नयाँ नियम ल्याएको छ । 

कुवेत सरकारले जनवरी ९ गतेदेखि फेब्रुवरी २८ गतेसम्म सार्वजनिक स्थान, मल तथा होटेलभित्र हुने सबै प्रकारका भेला गर्न प्रतिबन्ध लगाउने निर्णय गरेको छ । 

त्यसैगरी बुस्टर डोजका लागि ५० वर्ष माथिका नागरिक र आप्रवासीहरूका लागि सिधै खोप केन्द्रमा गएर खोप लगाउन पाउने तथा त्योभन्दा कम उमेर समूहकाले अनलाइनबाट स्विकृति लिनुपर्ने नियम ल्याएको छ । 

कुवेत भित्रिने हरेक यात्रुहरूले ७२ घण्टा अगाडि कोरोना परीक्षण गराउन अनिवार्य गरिएको छ । यद्यपी कुवेतले प्रतिदिन १० हजार यात्रुहरूलाई कोरोनाका मापडण्ड पालना गर्दै भित्र्याउने छ । 

कुवेत भित्रिने हरेक यात्रुहरूले १० दिन होम क्वारेन्टिन बस्नुपर्ने छ । तथापी होम क्वारेन्टिन बसेको तीन दिनमा  कोरोना परीक्षण नकारात्मक आएकाले भने क्वारेन्टिन बस्नुपर्ने छैन ।   

साउदी अरब 

अक्टोबर १७ तारिखबाट साउदी अरबले आफूलाई ‘मास्क फ्रि’ घोषणा गरे पनि डिसेम्बर ३० तारिखबाट अनिवार्य रूपमा फेरि मास्क लगाउने नियम ल्याएको छ । त्यसैगरी एक व्यक्तिबाट अर्को व्यक्तिले कम्तिमा १.५ मिटरको भौतिक दूरी कायम गर्नुपर्ने नियम लागू गरिएको छ ।  

साउदी अरबले बुस्टर डोजका लागि सबै नागरिक र आप्रवासीहरूलाई अनुरोध गरेको छ । 

यूएई

यूनाइटेड अरब इमिरेट्स (यूएई)ले अबुधावी प्रवेश गर्नका लागि नयाँँ नियम ल्याएको छ । अब अबुधावी प्रवेशकर्ताको अल हुसेन मोबाइल एप्समा ग्रिन सिग्नल आउनुपर्ने छ । 

मास्क नलगाई बाहिर निस्कनेलाई तीन हजार दिराम (९० हजार नेरु) सम्म जरिवाना गरिने छ । त्यसैगरी यूएईका विद्यालयहरूले दुई हप्ताका लागि अनलाइन कक्षा सञ्चालन हुनेछन् । 

बुस्टर डोजका लागि सबै नागरिक र आप्रवासीहरूका लागी सिधै खोप केन्द्रमा जान यूएईले आह्वान गरेको छ । 

यूएईले जिम्बाबे, घाना, यूगान्डा, केन्या लगायत ८ वटा देशका यात्रुहरूलाई प्रवेश निषेध गरेको छ ।   

कतार 

कतारले कोरोना तथा ओमिक्रोनका संक्रमितहरूको संख्या बढ्न थालेपछि अनिवार्य रूपमा फेस मास्क लगाउनुपर्ने नियम ल्याएको छ । 

कोरोनाको खोप लगाएको ९ महिनापछि एह्तेराज एपमा हुने गोल्डेन बक्स हराएर जाने र बुस्टर डोजको खोप लगाएपछि पुनः गोल्डेन बक्स आउने बनाइएको छ । 

बुस्टर डोजका लागि सबै नागरिक र आप्रवासीहरूले पूर्व स्वीकृतिबिना सिधै खोप केन्द्रमा गएर खोप लगाउने व्यवस्था गरिएको छ ।