पुस २३,काठमाडौँ | नेपाल वैदेशिक रोजगार व्यवसायी संघको आगामी नेतृत्व सहमतिको आधारमा छनोटको वातावरण मिलाउन गठित कार्यदलले पद बाँडफाँडको मस्यौदा बनाएको छ । सहमतिमा नेतृत्व छनोट गर्ने विषयमा मोडालिटी तयगर्न संघका कार्यवाहक अध्यक्ष कमल तामाङको संयोजकत्वमा १५ सदस्यीय कार्यदल गठन गरिएको थियोे । 

बिहीबार संघको कार्यालय बत्तीसपुतलीमा चार पूर्व अध्यक्ष तथा राजनीतिक दल निकट पाँच वटा संस्थाका प्रतिनिधिबीच ४ घण्टाभन्दा लामो समय नयाँ नेतृत्वमा संस्थागत प्रतिनिधित्व सन्तुलन सम्बन्धमा छलफल भएको थियोे । बैठकमा निर्वाचन र मनोनयनको प्रक्रियाबाट गठन हुने संघको २१ सदस्यीय कार्यसमितिमा शक्ति र सन्तुलनको आधारमा भन्दै पद बाँडफाँडको मस्यौदा पेश गरिएको थियो । 

कार्यदलका सदस्य सचिव मेघनाथ भुर्तेलका अनुसार पूर्व अध्यक्षहरूका तर्फबाट नेपाली कांग्रेस निकट नेपाल लोकतान्त्रिक वैदेशिक रोजगार व्यवसायी एसोसिएसनलाई २ पदाधिकारी र ५ सदस्य, एमाले निकट प्रगतिशील वैदेशिक रोजगार व्यवसायी मञ्च नेपाललाई २ पदाधिकारी र ३ सदस्य, नेकपा माओवादी केन्द्र निकट वैदेशिक रोजगार व्यवसायी गणतन्त्रिक मञ्चलाई १ पदाधिकारी र २ सदस्य, नेकपा एकीकृत समाजवादी निकट एकीकृत वैदेशिक रोजगार व्यवसायी संगठनलाई २ पदाधिकारी र ३ सदस्य तथा समाजवादी वैदेशिक रोजगार व्यवसायी संघलाई एक सदस्य दिएर सर्वसम्मतिले नेतृत्व चयन गर्न सकिने प्रस्ताव पेश भएको छ ।

कार्यदलमा संघका कार्यवाहक अध्यक्ष कमल तामाङ नेतृत्वको संयोजकत्वमा संघका पूर्व अध्यक्ष तारा प्रसाद भट्टराई, दिल प्रसाद पोखरेल, प्रेमबहादुर कटुवाल, तिलकबहादुर रानाभाट, बल बहादुर तामाङ, बिमल ढकाल, निवर्तमान अध्यक्ष रोहन गुरूङ, वरिष्ठ व्यवसायी नवराज ढकाल र किसन प्रधान सदस्य रहेको भएपनि बिहीबारको बैठकमा पूर्व अध्यक्षहरू भट्टराई, रानाभाट र तामाङ उपस्थित रहेनन् ।