मङ्सिर २२, काठमाडौँ । काठमाडौँ सामाखुसीमा रहेको फिस्टेल ओभरसीस प्रालि मार्फत मासिक १ लाख भन्दा बढी तलब हुन्छ भन्दै युएई गएका युवाहरु अलपत्र परे । पाँच महिना अघि युएई पुर्याईएका युवाहरु कम्पनी समेत देख्न नपाई आफ्नै खर्चमा बिहिबार नेपाल फर्किएका छन् । 

समस्यामा परेका सात जना मध्ये चार जना युवाहरु बिहिबार बिहान नेपाल आईपुगेका छन् । अलपत्र परेका तीन जना युवाहरु भने 'ओभरस्टे' को समस्याका कारण कहिले नेपाल फर्किन्छन् निश्चित छैन । नेपाल फिर्ता भएका युवाहरु नेपाल आएलगत्तै लगेजनै बोकेर ताहाचल स्थित वैदेशिक रोजगार बिभागमा उजुरी दिन पुगेका छन् । 

पीडित युवाहरुले प्रतिव्यक्ति ६ लाख तिरेर युएई रोजगारमा गएको बताएका छन् । उक्त म्यानपावरले समस्यामा पारेको ७ जना मात्र भने होइनन् सोहि म्यानपावरले बिदेशनै नपठाई नेपालमा ८ जनालाई पनि चर्को लागत अग्रिम अशुली गरेर ठगि गरेको पाइएको छ । 

युएईमा एजेन्टको झोलामा रहेको कम्पनीमा 'ड्राइभर' पदमा लागिएको तर पुगेपछि कम्पनी समेत नदेखाई एजेन्टको जिम्मा लगाइएको समस्यामा परेका युवाहरुले बताएका छन् ।युएईबाट अलपत्र भई नेपाल फर्किएका युवाहरुलाई लिन नेपालमै सोहि म्यानपावरबाट ठगिएका युवाहरु त्रिभुवन अन्तराष्ट्रिय विमानस्थलमै पुगेका थिए । 

समस्यामा परेका युवाहरु विमानस्थलबाट सिधै ताहचाल स्थित वैदेशिक रोजगार बिभागमा उजुरी दिन पुगेका छन् । उनिहरुले वैदेशिक रोजगार बिभागका निर्देशक लोकनाथ भुषाललाई भेटेका छन् । भेटपछि भुषालले पीडितहरुको समस्याबारे आफूले युएई स्थित नेपाली दुतावासको पत्र प्राप्त भईसकेको भन्दै सम्बन्धित म्यानपावरमाथि कारवाहीको प्रक्रिया अघि बढाईसकिएको जानकारी दिएका छन् । उनले युवाहरुले तिरेको लागत, बिदेशमा जति बसेको छ त्यसै अनुसार सम्झौता बमोजिमको तलब दिलाउने, नेपाल फर्किएको टिकट खर्च समेत फिर्ता गराउने र सम्बन्धित म्यानपावरलाई कारवाही गर्न बिभाग तत्पर रहेको जानकारी दिएका छन् ।   

यसै समन्धमा पुरा भिडियो रिपोर्ट तल हेर्न सक्नुहुनेछ ।