भदौ १९, काठमाडौँ | अमेरिकाको ह्युस्टन राज्यमा गोली हानी हत्या गरिएकी २१ वर्षीया मुना पाण्डेलाई एक वर्ष अघिबाटै कसैलाई पछ्याइरहेको हुनसक्ने देखिएको छ ।
क्लिकटुह्युस्टन डटकमसँग कुरा गर्दै उनका साथी दीपेन्द्र कुँवरले मुनाले एक वर्षदेखि कसैले पछ्याइरहेको भन्दै सहयोग मागेकी बताएका छन् ।
त्यसपछि आफूले नै अपार्टमेन्ट बाहिर सर्भिलेन्स क्यामेरा राख्न सहयोग गरेको कुँवरले बताएका छन् । क्यामेरा राखेपछि भने ती संदिग्ध व्यक्ति त्यहाँ देखिन छाडेका थिए । उनलाई त्यसबेला कसले पछ्याएको थियो भन्ने कहिल्यै खुलेन ।
कुँवरका अनुसार, क्यामेरा राखेपछि उनलाई मुनाको सुरक्षाबारे त्यति चिन्ता लागेको थिएन । तर, एक्कासी उनको अपार्टमेन्ट बाहिर अघिल्लो साता सोमबार अमेरिकी समयअनुसार बेलुकी साढे ५ बजे गोली हानी हत्या भएको थियो । प्रहरीले हत्यामा सर्भिलेन्स क्यामेराको फुटेजका आधारमा एक जना संदिग्ध व्यक्तिको तस्वीर सार्वजनिक गर्दै उनीबारे सूचना मागेको थियो ।
त्यसक्रममा प्रहरीले बबि सिंह शाह नामक व्यक्तिलाई पक्राउ गरेको छ । ह्युस्टन प्रहरीका प्रवक्ताका अनुसार, सीसी टीभीमा मुनाको अपार्टमेन्टबाट निस्किँदै गरेको देखिएका व्यक्ति शाह नै थिए । शाहलाई बुधबार अपराह्न ह्युटनको उत्तरपश्चिम क्षेत्रमा रहेको ट्राफिक स्टपबाट नियन्त्रणमा लिइएको प्रहरीले भनेको छ ।
प्रहरीले हत्या कारण र प्रयोग भएको हतियारको बारेमा खुलासा गरेको छैन। पाण्डे २०२२ मा अमेरिका गएकी थिइन् र ह्युस्टन कम्युनिटी कलेजमा अध्ययन गर्दै थिइन्। उनी स्थानीय एक स्टोरमा पनि काम गर्दै थिइन्। पाण्डेको स्थायी थलो भोजपुर हो र उनकी आमा काठमाडौंमा बस्दै आएकी छन्।
यस बिषयमा तपाइको प्रतिक्रिया...!