मङ्सिर २०, काठमाडौँ |  केहीदिन यता फेसबुकमा मम र चियाका तस्बिर चर्चामा छन् । यी तस्बिरले धेरै प्रयोगकर्ताको मन पनि जितेका छन् । तस्बिरहरू अब म:म र चियामा मात्र सिमित छैनन्, ‘भेराइटी’ थपिँदै गएका छन् ।

केही पहिला आधा आँखा बन्द गरेर विभिन्न मानिस र वस्तुको आकृति देखिने तस्बिरहरू यसरी नै सामाजिक सञ्जालमा छरपस्ट देखिन्थे ।

यिनै तस्बिर सेयर गरेर केहीले आफ्ना पुराना किस्सालाई क्याप्सनमा स्थान दिएका छन् । नेपाली परिवेशलाई झल्काउने यी तस्बिर साँच्चिकै मनमोहक जस्ता लाग्छन्, जुन ती तस्बिरको कमेन्टले स्पष्ट पार्छन् ।

म:मको ठूलो डल्ला समातेर भागेको बच्चालाई आमाले पछ्याइरहेको तस्बिर निकै भाइरल बनेको छ । त्यस्तै चियाकाे ठूलो गिलास वरपर मानिस बसेर आगो तापेको तस्बिर पनि निकै भाइरल छ । अहिले त सामाजिक सञ्जाल नै यिनै तस्बिरले रङ्गिएको छ ।

एक प्रयोगकर्ता ‘तिमल्सिना राज’ले यो तस्बिर सेयर गर्दै ‘देशको अवस्था कथा सुनाए एआईले यस्तो जवाफ दियो’ भनेर पोस्ट गरेका छन् ।

कहाँबाट आए यी तस्बिर ?

यी तस्बिर एआईबाट बनाइएका हुन् । ‘बिङ’ एप्सिकेसनबाट यी तस्बिर बनाइएका हुन् । ‘बिङ’ बाहेक अन्य एप्लिकेसनबाट पनि यस्ता तस्बिर बनाउन सकिने भए पनि चर्चामा यही एप छ ।

तस्बिर बनाउनका लागि तस्बिरका बारेमा केही शब्द उल्लेख गर्नुपर्छ, त्यसपछि एआईले तस्बिर तयार गरिदिन्छ । एकै पटकका थुप्रै तस्बिर आउँछन् । आफूलाई मन परेको उपयोग गर्न सकिन्छ ।

कसरी बनाउने यस्ता तस्बिर ?

मोबाइल र कम्प्युटर दुवैमा यस्ता तस्बिर बनाउन सकिन्छ । यसका लागि मानइक्रोसफ्टको खाता आवश्यक पर्छ, जुन बनाउन निकै सजिलो छ ।

https://www.bing.com/images/create गुगलमा सर्च गरेपछि बिङको गृहपृष्ठमा पुग्न सकिन्छ । त्यसपछि माइक्रोसफ्ट खाता नभएको अवस्थामा खाता बनाउनुपर्ने हुन्छ । गृहपृष्ठको माथिल्लो दाहिने कुनामा मानिसको पासपोर्ट फोटो जस्तो देखिने आइकनमा क्लिक गर्नुपर्छ ।

त्यसपछि खाता हुनेलाई लगइन र नहुनेलाई नयाँ खोल्नका लागि विकल्प दिइएको हुन्छ । आफ्नो आवश्यकता अनुसारको विकल्प छनोट त्यहाँ देखाइएको निर्देशन पालना गरेर खाता खोल्न सकिन्छ ।

खाता खोलिसकेपछि तपाईं एआई तस्बिर बनाउन योग्य बन्नुहुन्छ । तस्बिर बनाउका लागि गृहपृष्ठमा देखिएको लाम्चो आकारको बक्स प्रयोग गर्नुपर्छ । त्यही बक्समा आफूले चाहेको फोटोको वर्णन गर्नुपर्छ, र ‘क्रिएट इमेज’ क्लिक गरेर प्रक्रिया अगाडि बढाउनुपर्छ ।

थोरै समयपछि तपाईंले वर्णन गरेजस्तै विभिन्न तस्बिर आउँछन् । जुन तस्बिरतपाईंले आवश्यक ठाउँमा प्रयोग गर्न सक्नुहुन्छ ।