पर्वत । जिल्लामा नयाँ ब्यबसायिक लगानीका क्षेत्रको खोजी गर्न पहिलो पटक लगानी बहस कार्यक्रम कुश्मामा गरिएको छ ।

पर्वत उद्योग बाणिज्य संघको अगुवाईमा  जिल्लामा लगानी सम्भावनाको बहस  गरीएको हो । पछिल्लो समयमा साहसिक पर्यटनको गन्तब्य बन्दै गएको पर्वतमा थप लगानीका क्षेत्रहरुको खोजी र लगानीको सुनिश्चिता गर्न बहस कार्यक्रम आयोजना गरिएको पर्वत उद्योग बाणिज्य संघका अध्यक्ष केदारनाथ शर्माले बताउनुभयो । 

पर्वतमा खानी उद्योग सञ्चालन, पर्यटन उद्योग, तथा कृषिजन्य उद्योग तथा जलबिद्युतका क्षेत्रमा नयाँ लगानी भित्याउने उद्देश्य राखिएको छ ।

लगानी बहस कार्यक्रममा नेपाल भ्रमण बर्ष २०२० का राष्ट्रिय संयोजक तथा नेपाल उद्योग बाणिज्य महासंघका पुर्वअध्यक्ष सुरज बैध, पुर्वअध्यक्षहरु बिनोदबहादुर श्रेष्ठ तथा कुशकुमार जोशी सहभागी थिए । उनीहरुले जिल्लाका व्यवसायीहरुलाई पहिले आफै लगानी गर्न सुझाब दिएका छन् । उनीहरुले जिल्लामा पहिचान भएका लगानीका क्षेत्रमा  आफै लगानी गरे आफूहरुले सहयोग गर्ने बताए ।

गण्डकी प्रदेशका सभामुख नेत्रनाथ अधिकारीले सुनको थाल थापेर मगन्तेको झै भिक माग्न नहुने बताएका छन् । हामीसँग भएका लगानीको क्षेत्रको पहिचान गरी आर्फैले लगानी गर्न सके त्यसको फाइदा आफैलाई हुने बताउँदै उनले  यस्तो बताएका हुन् । आफूले लगानी गर्न डराउने र अरुलाई लगानी गर्नको लागि हारगुहार गर्नु उचित नभएको भन्दै पहिले आफैले लगानी गरेर अरुलाई लगानीको वातवरण बनाउन समेत उनले सुझाए ।

प्रतिनिधिसभा सदस्य पदम गिरीले जिल्लामा भएका लगानीका क्षेत्रको पहिचान गरी त्यसमा लगानी गर्नको लागि राज्यले आवश्यक प्रर्वद्धन मिलाउने बताए । 

बहस कार्यक्रममा पर्वतको फलामखानी उत्खनन र माटेमा रहेको स्टेल ढुंगाखानी, कुस्माबजार र आसपास रहेका पर्यटकीय क्षेत्रमा सिसाको पुल, रक क्लाइमबिङ्ग, हेलिकप्टर, अल्ट्राईट जस्ता साहसिक पर्यटनका थप पुर्वाधार र होटल रिर्सोटमा लगानी, पर्यटकीय क्षेत्रहरुमा केवलकार बनाउने, लप्सी प्रशोधनका ठुलो उद्योग सञ्चालन गर्ने र कालीगण्डकी र मोदीखोलामा थप जलबिद्युत आयोजनाहरुको बिकासका लागि लगानीको खोजी गरिएको थियो ।

पर्वत जिल्ला पोखराबाट नजिक रहेको , कालीगण्डकी करिडोर र मध्यपहाडी लोकमार्गको ट्रान्जिट प्वाइन्टमा रहेका कारण उद्योगहरुको स्थापना, खानी उद्योगको सञ्चालन, पर्यटनका नयाँ नयाँ गन्तब्यको बिकास गर्न सकिने संभावना छ । पर्वतका कालञ्जर क्षेत्र, कुस्मा क्षेत्र, पञ्चासे, डहरे, महाशलिा क्षेत्र र कालीगण्डकी किनारमा धेरै पर्यटकीय संभावना भएकाले साहसिक र धार्मिक पर्यटनको बिकास गर्न सकिन्छ । यस बाहेक लागनीका अध्यक्ष क्षेत्रका बारेमा पनि बहस कार्यक्रममा छलफल हुने र लगानीको आश्वासन समेत आउने बिश्वास लिएको अध्यक्ष केदारनाथ शर्माले बताउनुभयो ।