सानेबहादुर नेपाली। साउन ३, तनहुँ । बन्दिपुर गाउँपालिकाले दश हजार बाख्रालाई ‘पिपिआर खोप’लगाएको  छ । गाउँपालिकाभित्र रहेका छवटै वडाका टोलटोलमा प्राविधिक पुगी बाख्रालाई पिपिआर रोग विरुद्धको खोप लगाएका हुन् । सो रोग लागेपछि बाख्रालाई बचाउन नसकिने हुँदा रोग लाग्नु अगावै अग्रिम खोप लगाउने अभियान थालिएको  गाउँपालिकाका पशु शाखा प्रमुख मधुविलाश न्यौपानेले जानकारी दिनुभयो । 

त्यसैगरी गाउँपालिकाले तीन हजार पाँच सय गाईवस्तुमा खोरेत रोग विरुद्धको खोप तथा कुकुर र बिरालो गरी दुई सयलाई रेबिज विरुद्धको खोप लगाएको छ । गाउँपालिकाले दश वटा माउ बाख्रा पालेका कृषकलाई ५० प्रतिशत अनुदानमा उन्नत जातको बोयर बोका वितरण गरेको छ । गाउँपालिकाका २१ जना कृषकलाई रु ४० हजार बराबरको बोयर बोका वितरण गरिएको हो । स्थानीय जातको कुखुरा संरक्षण गर्ने उद्देश्यले पाँच जनालाई कुखुरापालन र पाँच जनालाई बङ्गुरपालनका लागि ५० प्रतिशत अनुदान रु ४० हजार सहयोग गरेको उहाँले जानकारी दिनुभयो । उक्त अनुदान पाउनका लागि गाउँपालिकाले तोकेअनुरुप मापदण्ड पूरा गरेको हुनुपर्ने व्यवस्था गरेको छ ।

वडाध्यक्षको भत्ता शैक्षिक संस्थालाई

बन्दिपुर गाउँपालिका–१ का वडाध्यक्ष भानुभक्त पोख्रेलले आफूले पाउँदै आएको भत्तामध्ये केही रकम यहाँको एक शैक्षिक संस्थालाई सहयोग गर्दै आउनुभएको छ । सोही वडास्थित जनता आधारभूत विद्यालयमा निजी स्रोतमा कार्यरत शिक्षिका रीता थापालाई तलब खुवाउन वार्षिक रुपमा सहयोग गर्दै आउनुभएको हो ।सीमान्तकृत चेपाङ, भुजेलका बालबालिका अध्ययनरत उक्त विद्यालयको कुनै पनि आयस्रोत नभएपछि शिक्षक राख्न नसक्दा पठनपाठन प्रभावित भएको विद्यालयका प्रधानाध्यापक माधव पोख्रेलले जानकारी दिनुभयो । उहाँले निजी स्रोतका शिक्षकलाई वार्षिक रु ७८ हजार उपलब्ध गराउँदै आएपछि पठनपाठनमा सहज भएको उहाँले बताउनुभयो ।

गत वर्षदेखि सहयोग गर्न सुरुआत गर्नुभएका अध्यक्ष पोख्रेलले आफ्नो कार्यकालभरि सहयोग गर्ने प्रतिबद्धता व्यक्त गर्नुभएको विद्यालय प्रशासनले जनाएको छ । विद्यालयमा एक शिक्षिका थप गरिएपछि शैक्षिक गुणस्तरमा वृद्धि हँुदै गएको छ । विद्यालयको आफ्नो जग्गा नहुँदा ओइलेनी जग्गामा उक्त विद्यालय सञ्चालन गरिँदै आएको बताइएको छ । विद्यालयको आफ्नो जग्गा नभएपछि स्थानीय समाजसेवी बाबुराम घिमिरेले चार आना जग्गा दान गरेपछि उक्त जग्गामा विद्यालयको नयाँ भवन निर्माण गरिएको विद्यालयका पिटिए अध्यक्ष सुदीप पोख्रेलले जानकारी दिनुभयो । रासस